New Delhi, Nailur 06 : Ha ka por bala thnem bha ka jingkynthoh pyrshah ia ka jingpynkylla ia ka shuki ka Draupadi Murmu naka “President of India” sha ka “President of Bharat”, mynta pat sa kawei ka kot kala mih bad nang ai ding namar ka jingpynman ia u Narendra Modi kum ka “Prime Minister ka Bharat”.
Ia kane ka kot la pynsaphriang da u Nongaiktien ka BJP Sambit Patra ha ka X (Twitter ba mynshuwa). Kane kala khring ia ka jingshah kynthoh kaba jur na ka Congress, kaba pyrshah ia kane ka sienjam ba thmu ban shim da ka Sorkar Pdeng.
‘The Prime Minister Of Bharat’ pic.twitter.com/lHozUHSoC4
— Sambit Patra (@sambitswaraj) September 5, 2023
Ka Congress kala kdew ba ka ‘Asean-India Summit’ bad ka ‘Prime Minister of Bharat’ la pyndonkam ha kane ka juh ka kot bala pynsaphriang paidbah.
Haba kynthoh ha ka X, u General Secretary ka Congress Jairam Ramesh ula thoh “Peit ba haduh katno ka Sorkar u Modi kala kulmar jingmut. U Prime Minister of Bharat ha ka 20th ASEAN-India Summit..Baroh kine ki dei ki drama tang namar ki Liang Pyrshah kila iatylli bad khot ialade ka INDIA”.
Look at how confused the Modi government is! The Prime Minister of Bharat at the 20th ASEAN-India summit.
All this drama just because the Opposition got together and called itself INDIA 🤦🏾♂️ pic.twitter.com/AbT1Ax8wrO
— Jairam Ramesh (@Jairam_Ramesh) September 5, 2023
Ka jingkhot sngewbha ka G20 ia ka President kala lam ruh sha ka jingmutdur ba don ka jingthmu ban pynkylla ia ka kyrteng jong ka Ri bad kane ka lah ban urlong ha ka Dorbar Kyrpang jong ka Parliament ka ban long naduh ka 18 tarik Nailur haduh 22 tarik Nailur.
Hynrei, ka jingshisha hi ka long ba ka Sorkar kam pat pynbna ia ki mat ban iatai ha kane ka Dorbar Kyrpang, kaba pyni ba ka dang dei tang kaba shu antad.
U khliehduh ka AAP bad Myntri Rangbah ka Delhi Arvind Kejriwal ha ka sngi Ba-ar ula ong “Tang namar ba ki Liang Pyrshah kila thaw ia ka kynhun synrop ba khot ka INDIA, hato ka Sorkar Pdeng kan pynkylla noh ia ka kyrteng jong ka Ri?. Ka Ri ka dei jong ki 140 klur ngut ki briew, ym jong kawei ka party. Lada ia ka kyrteng jong ka kynhun synrop la pynkylla sha ka Bharat, hato kin pynkylla ia ka kyrteng ka Bharat sha ka BJP”.
Ka kot ba pyni ia ka jingleit iuhkjat u Myntri Rangbah Duh ka Ri sha Indonesia ha ka sngi Balang bad sngi Palei ban iashim bynta ha ka 20th ASEAN-India Summit bad ka 18th East Asia Summit kala pyndonkam ia ka kyntien “Prime Minister of Bharat”
