Nongpoh, Lber 09 : Ar-sngi hadien ka jinglap ia ka Khlieh u Rangbah kaba per harud ka Pung Umiam, hynne ka sngi Palei, ki paidbah ki la lap pat sa ia ka Kti kaba la per ha sla um bad kumjuh ruh ia ka met kaba la tep harud ka pung Umiam.
Kat kum ka khubor Pulit la iathuh ba ia u utei u rangbah, uba la shah pyniap dusmon ha ki riew thrang snam, la wan ban bret ha katei ka jaka bad la tip ia u kum u Bah Omeka Myrthong na ka shnong Mawlaingut, East Khasi Hills bad uba dei ruh u rangbah uba la don 5 ngut ki khun.
Ka rukom shah pyniap ia utei u rangbah, ka la long kaba itriem haduh katta katta, ha kaba ki runar, ki la Khrai ia ka khlieh bad khet ruh ia ka kti hashuwa ba kin bret ia ki sha ka pung Umiam.
Hadien ka jinglap ia ka met bad kti, ki pulit ka Ri Bhoi ha ryngkat ka jingdon kiba haiing lem bad ki briew na ka shnong, ki la leit ban shimti noh ia ka met jong utei u rangbah bad ban leh ia kaba donkam baroh katkum ki kyndon Ain.
U Bah Saindor Nongbsap, Secretary Shnong Mawlaingut, u la iathuh ba katkum ka jingiathuh da kiba haiing jong utei u rangbah ba la shah pyniap, la ong ba u la jah na shnong naduh ka 26 tarik mynta u bnai, ha kaba ka shnong hadien ba ki la ioh jingtip halor katei ka jingjah utei u rangbah, ka la pyrshang ban wad ia u hynrei kim shym la lap satia tad haduh ba kiba haiing ki la lap ia ka met na ka Pung Umiam.
Utei u nongialam shnong, u la ong ruh ba utei u rangbah, u dei u briew uba bha bad ba um don kano kano ka dak sniew ha shnong ha thaw bad u dei ruh u briew uba kloi ban iatreilang bad ki bor shnong bor thaw.
Na ka liang ka shnong ka pynrem jur ia ki runar kiba pyniap dusmon ia utei u rangbah bad kiba la dawa ruh ia ka tnat pulit ba ki dei ban shimkhia ha ka ban thwet ia ki runar bad ban ai ia ka jingpynsaja kaba tyngeh, khnang ba kum kitei ki jingjia kin nym jia shuh nangne shakhmat.
