Shillong, Nailar 08 : U Chairman ka Regonal Committee ka West Khasi Hills bad Myntri Sorkar Bah Paul Lyngdoh u pyntip ba ki Regional Committee ka Assam bad Meghalaya kin sa leit ban jurip ia ka Langpih Sector hadien ka jingrakhe ia ka Independence Day.
U Bah Paul u pyntip ia kane hadien ka jingialang bala pynlong ha ka sngi Ba-ar bad u Chairman ka Regional Committee ka Kamrup District bad Myntri Sorkar ka Assam, u Chandramohan Patoway, kaba long ha Amingaon, Kamrup Assam.
U Bah Paul ula ong ba ka jingiakren hynne ka sngi ka thmu ban pynbeit ia ki jingeh kiba mih na baroh ar Jylla bad ban wad ia ki lynti ban iapynbeit da ka jingiasngewthuh jingmut halor ka jingiakajia pud khamtam ha Langpih Sector, kaba dei kawei na ki jaka ba jur bha ka jingiakynad.
Ula pyntip ba ki artylli ki Committee kila rai ban leit jurip lang ia ka thain Langpih hadien ka jingrakhe ia ka Independence Day bad ban iakren bad ki kynhun bapher bapher nalor ki Nongshongshnong, ki Nongialam shnong bad ki Khlieh Nongsynshar.
“Ka jingiakren ka long kaba seisoh bha bad ka don ka mynsiem ban iaburom markylliang…ka Sorkar Assam ka kwah ia ngi ba ngin ai jingtip ia ki jaka kibym don jingiakajia ha kaba ki nongshongshnong jong kine ki jaka ki kwah ban neh bad ka Meghalaya nalor ki Voter ID bala register ha Meghalaya bad ki kam pynroi bala pyntrei da ka Sorkar Meghalaya ha kine ki phew phew snem bala leit noh” ula ong.
U Bah Paul u ong baka don ka jingkyrmen ba kine ki jaka ki lah ban pynphai pat sha ka Jylla Meghalaya.Ula ong ba da ka jingiatreilang bad ka Sorkar Assam, ka lynti ka don ha kaban lah pynbeit noh kham kloi ia kane ka jingiakajia kaba la sahteng la slem bah.
Ula pyntip ruh ba kine ki Regional Committee jong baroh artylli ki Jylla kila mynjur ba ki don ki jaka kiba don hapdeng ka jingeh ban iapynbeit.
“Katto katne ki jaka ki dei kiba la ithuh kum ki jaka kiba don jingeh bha hynrei ngin wad ia ka lynti kaba pdiang bad mynjur lang, ia kaba ngin sa iakynduh biang hadien ka 15 tarik Nailar ha Shillong”ula bynrap.
Pule lang ia kane: Tyrwa ka Supreme Court ia ka Committee ban tohkit halor ki kam iaumsnam ha Manipur
Peit lang ia kane
