Shillong, Nailar 09 : U General Secretary ka kynhun ba kyrshan ia ka jingiakren iasuk ka United Liberation Front of Asom (ULFA) Anup Chetia ha ka sngi Balang ula ong ba ka jingiakren iasuk hapdeng ka ULFA bad ki nongmihkhmat ka Sorkar India bad Sorkar Assam kan sa long biang ha New Delhi hadien ka 15 tarik Nailar.
“Dang shen, ngi la iakynduh ia ka kynhun na ka Sorkar India bad Sorkar Assam. Hadien ka jingrakhe Independence Day, ngi kyrmen ba ka jingiakren jong ngi kan long ha New Delhi bad ki Nongmihkhmat ka Sorkar India bad ka Sorkar Assam” ong u Chetia haba iakren bad ki nongthoh khubor.
Une u Nongialam ka ULFA ula don ha Shillong ban iashimbynta ha ka International Day of the World Indigenous Peoples bala pynlong da ka North East Indigenous Peoples’ Forum (NEIPF) ha North Eastern Hill University (NEHU). U Chetia u dei ruh u Covener jong ka NEIPF.
Haba pynpaw ia ka jingkyrmen ba ka jingiakren iasuk kan sa kut noh shuwa u 2024, u Chetia ula ong “Shuwa ka elekshon ngi kyrmen ba ngin lah pynbeit noh bad ka Sorkar India”. U iathuh ba ka Sorkar India ka kwah ban don ka jingiateh kular bad ka kynhun ba kyrshan ia ka jingiakren iasuk jong ka ULFA.
“Ka Sorkar India ka sngewthuh ruh ba lada ka iasoi ia ka soskular ba ngi, kane kan pynkut noh ia ki jingeh jong ka Assam” ula bynrap.
Haba kylli la kan don ka jingkyrshan ia u Nongialam ka ULFA-I Paresh Baruah ban wan lang noh sha ka jingiakren iasuk, u Chetia ula ong “Ngi la iakren bad u…hynrei kan shong pat ha ka Sorkar India, lad aka Sorkar India ka kwah ban iakren bad u bad ka kynhun jong u. Hynrei kam shym la don ka jingaiktien bad ka Sorkar India bad ka jingdawa jong ki ruh ka dang dei hi ka juh kumba long mynshuwa bad ka Sorkar India kam lah satia ban pdiang ia ka jingdawa jong ki”.
Kat kum ka jingong jong u, lada kane kawei ka kynhun ka wan lang sha ka miej iakren iasuk, kan long kaba bha eh ia ki paidbah bad ia ka Jylla Assam.
Hynrei u Chetia ula ong ba u Baruah um shym la don satia ha Bangladesh. “Ngi don jingtip shano u don hynrei ka jingiakren ka dang iaid beit bad ngi” ula bynrap.
