Shillong Nailar 28: Ki Regional Committee jong ka Meghalaya bad Assam hynne ka sngi Nyngkong kila rai ban ia leit jurip lang iaki shnong kiba don ha ka thain Langpih ha u Nailur hadien ba la kut ka dorbar synrai ha kine ki artylli ki jylla.
Ia katei ka rai la shim ha ka jingialang ka ba-ar hapdeng ka Regional Committee ka West Khasi Hills kaba la ialam da u Myntri Sorkar Bah Paul Lyngdoh bad iaka Regional Committee jongka Kamrup district la ialam da u Myntri sorkar ka Assam u Chandra Mohan Patowary ha ka jingialang kaba la long ha Pinewood hotel, Shillong.
Haba iakren bad ki nongthoh khubor, u Bah Paul Lyngdoh ula ong ba ka jingialang kala lah ban pynduna ia ka jingdon jong ki jaka kiba don hapdeng ka jingkajia pud ia kaba la ia kam trai da baroh ar tylli ki jylla.
“Ki Member of District Council (MDC) bad ki Deputy Commissioner jong baroh ar tylli ki jylla, kila shah pynkhamti ia ka kam ba kin pynkhreh iaka thup kyrteng jongki shnong ki bym don ka jingiakynad ne jingkajia, ha ka jingialang ban wan, ha kaba ngin leit ban pynlong ia jurip lang ia ka thain khappud” ong u Bah Paul.
U Chairman ka Regional Committee ka West Khasi Hills, ula ong hadien katei, ki ar tylli ki regional committee kin iakynduh ban leit iaka jingjurip lang ia ki shnong kiba don hakathain Langpih ha u Nailur hadien ba la kut ka dorbar synrai jong kitei ki ar tylli ki jylla.
“Ngin ialeh ban leit ha ki 4-5 tylli ki shnong bad ban jied iaka jaka kaba long pdeng bha na ka bynta ban gin iakynduhlang khnang ba ngin ioh ban ia jurip lang ha u Nailur” ula ong.
“Ngim lah ban long kiba thikna namar ba kum kine ki kam ki long kiba ka kyllain bha bad ngim kwah ba kan mih kano kano ka jingkynthoh bad ngim kwah ruh ba kino kino ki kynhun kiba khwan myntoi kin shim kabu na ka jingiakren khamtam haba ka jingiakren ka dang iaid shakhmat” ula ong.
Katba u Chandra Mohan Patowary ula ong ba ka jingiakren ka long kaba sngewtynand bad kaba seisoh bad baroh ar tylli ki jylla kila depban ai ai mar kylliang ia ki jingthoh ha kaba iadei bad ka jingkam trai ia ki jaka ki puta haka thain Langpih.
“Ngi la don iaka jingialang kaba sngewtynnad mynta ka sngi bad ngi la lah ban pynduna iaki jaka kiba don jingiakajia. Kham mynshwa ki bun bha hynrei mynta ngi la lah ban pynduna noh bad nga kyrmen ba hadien ba la kut ka dorbar jong ka jylla Meghalaya bad Assam ha u Nailur, ngin ia leit ban jurip lang ia ka thain Langpih bad ngin sa pynbeit ia ka tarik bad hadien ba la dep ban wan jurip, ngi ngeit skhem ba ngi lah ban pynkut noh iaka jingiakren bad ngin poi noh sha kaba kut jong ka jingialang” ong u Patowary.
