Shillong Rymphang 26: U Myntri Rangbah ka jylla Conrad K Sangma hynne ka Sngi Balang ula ong, ba yn sa kyrpad ia u Myntri Rangbah ka jylla Assam Himanta Biswa Sarma, ban sdang biang noh ia ka jingiakren pynbeit pud jong ka wat ka ba-ar na ka bynta ban pynbeit noh sa ia ki 6 tylli ki jaka ba dang sah, hadien ba kut ka Dorbar Mang Tyngka.
Haba iakren bad ki nongthoh khubor, u Myntri Rangbah ula ong, “Hadien ka Dorbar Mang Tyngka, ngan sa tyrwa biang ia u Myntri Rangbah ka Assam ba ngi dei ban iakynduh noh bad ban pyniaid biang shakhmat ia ka jingiakren”.
“Ha ka jingshisha, ngi lah dep ban iakren ia kane bad u Myntri Rangbah ka Assam bad ngi dang ap ia ka tarik kaba biang tam” ula bynrap.
Halor ka jingpynslem ban iakren pynbeit pud, u Conrad Sangma ula ong, “Kumba nga ong, ngi la don ia ka jingthmu ban iakynduh hynrei kila mih noh ki jingpynlong ia ka elekshon ne ki don noh ki prokram kiba heh kiba long ha Guwahati. Nga ngeit skhem ba hadien jong ka Dorbar Mang Tyngka, ngin pyrshang ban iakynduh biang ban pyniaid shakhmat noh ia ka jingiakren”.
“Ngi lah don ia ka elekshon shiteng samoi ha Gambegre bad ngi lah don ia ka elekshon jong ki District Council bad mynta ngin don sa ia ka Dorbar Mang Tyngka bad ka Assam kan don ia la ki jong ki prokram, namar kiba bun ki daw, ngim shym la iohlad ban pyniaid shakhmat ia ka jingiakren” ula ong.
