Shillong, Jymmang 02 : U Myntri Rangbah ka Jylla Conrad K Sangma hynne ka sngi Ba-ar, ula pyntip ba ka Sorkar Jylla kan sa sdang iakren bad ki kynhun bapher bapher halor ka jingpyntreikam ia ka Roster System hadien jong ka 15 tarik u Jymmang.
Haba iakren bad ki nongthoh khubor, u Conrad ula ong ba ka Sorkar kala ioh ia bun ki jingbatai na ki Tnad bapher bapher halor kane ka kam bad ka Kynhun Myntri ka dang bishar ia kine baroh bad ka jingiakren bad ki kynhun bapher bapher kan sa long hadien ka 15 tarik Jymmang.
“Ngin sa khot lang ia baroh. Ngi don jingmut ban khot ia baroh ki dkhot ka MDA, baroh ki seng sain pyrthei, baroh ki kynhun sengbhalang na ki thain bapher bapher bad kiwei kiwei ki kynhun ba kongsan kynthup ia ki Nongialam Niam namar ka dei kaei kaei kaba ngi sngew ba baroh ki dei ban ia don bynta lang bad ban sngewthuh ia baroh ki jingshisha” ula ong.
“Kumta hadien ka 15 tarik Jymmang, kine ki jingialang kin sa sdang ha ka kyrdan ka Sorkar Jylla bad kumjuh ruh ha ki kyrdan jong ki District haba donkam” ula bynrap.
