Shillong, Rymphang 14 : Kumba 450 tylli ki kali shimet ba leit buh leit shaw skul, kin nym iaid shuh ha surok shisien ba ki bos skul kila iaid haka nongbah Shillong.
Kane ka long katkum ka kaiphod kaba la aiti daka Jylla hakhmat jong ka Meghalaya High Court hynne ka sngi.
Ha ka jingbteng ban tian bishar hadien ba la pynmih iaka hukum haka 7 tarik u Rymphang, ka sorkar jylla kala pyntip ba ka lad kaba lah ban pyntreikam mardor kadei da ka jingpyniaid noh ia ki bos skul.
Ka sorkar ka khmih lynti ba kumba 450 tylli ki kali shimet ba ju leit buh bad shaw skul kin ym iaid shuh ha ki surok lada kala don ka jingpyntreikam pura ia ki bos skul.
Kala pynpaw ruh ba ia kum katei ka sienjam dei ban pyntreikam noh mardor bad ia u soh (result) yn sa iohi ha shwa ba u bnai yn kut noh.
Ha ka hukum kaba la pynmih hadien ka jingbishar iaka PIL, ka iingbishar kala pynpaw ba ka long ka sienjam kaba biang kaban shim da ka sorkar jylla bad lada 250 ne 300 tylli ki kali kin ym iaid ha ki surok ka nongbah Shillong, kan pynduna shibun ia ka jingdheng kali.
La khmih ruh ba ki bos skul kin sdang ban iaid noh mardor hadien ba ki skul kila sdang bad yn pynshlur ruh ia ki kmie ki kpa bad iaki bahaiing bahasem jong ki Khynnah, ba kin phah ia ki khun ki kti jongki ban pyndonkam da ki bos skul, shisien ba ka sorkar jylla kala buh iaki sienjam kiban ai jingiada bad jingshngain.
Ka iingbishar kala bthah iaka sorkar ba kan thung ia ki briew kiban khmih bniah na ka bynta ban pynduna iaka jingkhap ngiah kum resol kabamih na ka sienjam kaba la tyrwa, katba ia kiwei pat ki sienjam kiba la dep ban kdew kham hashwa dei ban pyndep ia ki katkum ka por kaba la buh.
Ka iingkashari kan shong bishar biang ia kane ha ka 14 tarik u Lber.
