Shillong, Nailar 10 : Ka Khasi Hills Autonomous District Council (KHADC) kala rai ban pynlong biang ia ka tamasa ba pawnam ka Jylla bala tip kum ka Monolith Festival, kaba la pynsangeh mynta la 7 snem eiei, ha Khasi Heritage Village, kaba don ha Mawphlang.
Ka KHADC kala buh ban pynlong ia kane ka tamasa kaba la khring bha ia ki nongshangkai pyrthei na satlak ka pyrthei, ha u bnai Nohprah mynta u snem.
Ha ka sngi Palei, ka Executive Committee bala ialam da u Chairman ka KHADC Bah Lamphrang Blah, kala leit ban jurip ia ka Khasi Heritage Village ban pynthikna ba ka jingpynkhreh pynkhrum ia ka tamasa kan long kaba iaid beit iaid ryntih.
Ka KHADC ka kyrmen skhem ba kan pynlong ia kane ka tamasa kaba kham heh bad kaba kham biang shuh shuh ban ia ki tamasa Manolith Festival jong ki snem bala leit noh.
Haba iakren bad ki nongthoh khubor hadien ka jingjurip, u Chairman ka KHADC Bah Lamphrang Blah ula ong b aka rai ban pynlong biang ia ka Monolith Festival ka dei kaba la leh da ka jingthmu ban pyni nam sha ka pyrthei ia ka spah jong ka Jaidbynriew Khasi ha ka Riti Dustur, ka Deiti Tynrai bad ki jingdon jingem jong u men barim.
U Bah Lamphrang ula ong ba kane ka tamasa ban pynlong mynta u snem kan iapher bha bad ki tamasa bala dep pynlong namar ka Sorkar MDA ba ialam da u Myntri Rangbah Conrad K Sangma, kan ai jingkyrshan ia ka Council ha kaban pynlong ia kane ka tamasa ha kata ka rukom ban kyntiew ia ka riti dustur bap her bad jingleh tynrai jong ka Jaidbynriew Khasi.
Ka tamasa Monolith ba la pynlong khatduh ka dei ha u Risaw 2016 ha kane hi ka jaka ha Mawphlang. Hynrei, namar ka jingiakynduh ia ka jingeh ha ka pisa pilain, ka KHADC kala rai ban pynsangeh shuwa ia kane ka tamasa.
Ka thong ba hakhmat eh jong ka KHADC ban pynlong ia kane ka tamasa ka long ban wanrah bad pyni nam ha kajuh ka rynsan ia ka spah jong ka Jaidbynriew Khasi haba phai sha ka riti dustur, ka dei tynrai bad ka jingdon jingem ki men barim.
Pule lang ia kane: Rai iatreilang ka KSU bad ka ATSA halor ki ishu ba ktah ia ki paid NE ha South India
Peit lang ia kane
