Shillong, Naiwieng04 : Ka Sorkar Jylla hynne ka sngi Nyngkong, kala plie ia ka surok Them Metor, ban pyniaid ia ki kali na Them Iew Mawlong sha Bimola Junction, kaba la khang la hynriew snem naduh ba mih ka huri hura pyrshah Harijan ha u snem 2018.
Kane ka surok ka dei kaba kongsan bha ha Shillong khamtam ha ka thain Iewduh, kaba khapngiah ki surok bad ba jur bha ka jingdheng kali. La plie ia kane ka surok halor ka nongrim ban pynduna ia ka jingdheng kali.
Ka Deputy Commissioner ka East Khasi Hills kala pynbna ha ka 30 tarik Risaw ban plie noh ia kane ka surok naduh ka 4 tarik Naiwieng, bad la shah ia ki kali ban iaid tang hapdeng ka por 8 baje mynstep haduh 4 baje janmiet.
Watla ka jingplie ia kane ka surok ka dei kaba la pdiang da kiba bun balang khamtam ki nongniah bos bad ki nongshong dukan ha Iew, hynrei katto katne ki sengbhalang bad ki seng sain pyrthei kila pyrshah jur da kaba ong ba ka Sorkar kam pat dei ban plie ia kane ka surok katba kim pat pynkynriah iaki briew ba sah be-ain ha Them Iew Mawlong sha kiwei pat ki jaka.
Ka seng the Federation of Khasi Jaiñtia and Garo People (FKJGP) kala kynnoh ba kane ka rai jong ka Sorkar ka dei tang ka jingpynthame ia ki paidbah da ka jingthmu ban pynslem ia ka jingpynkynriah ia ki briew ba sah be-ain.
Napdeng ki seng sain pyrthei, ka Khun Hynniewtrep National Awakening Movement (KHNAM) bad ka Voice of the People Party (VPP) kila pyrshah jur ia kane ka rai.
U MLA ka VPP na North Shillong Bah Adelbert Nongrum ula pynrem ia ka Sorkar bad ong ba kala pyndonkam ia kane ka jingplie surok ban pynthame ia ki paidbah. U Working President ka KHNAM Bah Thomas Passah ula pynpaw ia ka jingsngewkhia bad kane ka jingplie biang ia ka surok ka lah ban pynslem ia ka jingthmu ban pynkynriah ia ki 342 tylli ki Longiing na ka thain.
Wat hapdeng kine ki jingpyrshah, ka Deputy Commission kala ong ba ka jingweng ia ka ‘No Entry’ ka dei eh na ka bynta ban pynduna ia ka jingdheng kali ha ka thain.
