Guwahati, Naitung 21 : Ka iingbishar Guwahati High Court ka la pyllait jamin noh ia ka samla pule kolej 19 snem rta ka ba la shah kem noh halor ka jingkynnoh pynphriang ia ka jingthoh pyrshah ri lyngba ka social media
Kane ka samla ka ba kyrteng ka Barshashree Buragohain ka la shah kem noh naduh ka 18 tarik u Jymmang ba la dep bad don hapdeng ka jingshah set ha ka jingkhmih jong u magistrate ha Golaghat naduh katei ka por.
Kane ka samla ka la shah pynngat ruh ha ka kyndon ain Unlawful Activities (Prevention) Act.Ia ka jingkyrpad jamin ka jong ka la iathuh ba ym shym la pynpaw pyrshah da ki riewsaid ain.
Lah ban kdew ba ka Buragohain ka dei ka ba dang pule ha ka second-year Bachelor of Science hapoh DCB Girls College ha Jorhat.Kane ka samla ka la ioh ruh ban thoh pyndep ia ka eksam jong ka hapoh ka phatok.
Kane ka samla ka la shah kem noh namar ka jingthoh ia ka poetry ha ka ktien Assamese ka ba ong “Swadhin xurujor dixe akou ekhuj, Akou korim rashta druh” (Sa shisien jam sha ka jinglaitluid, sa shisien pat Ngan leh ia ka kam pyntriem pyrshah ia ka ri).
Watla kam shym la don ka jingkdew ia ka kynhun seng lehnoh United Liberation Front of Asom-Independent, hynrei ha ka FIR la ong ba kane ka jingpynpaw ka jong ka ka kdew halor ka jingai jingkyrshan ia ka seng lehnoh ba la khein beain ka ULFA-I.
Katba ki ba bun ki la pynksan ia ka Buragohain, na ka liang ki ba haiing hasem ki jong ka ki la ong ba kane ka poetry kam dei satia ka ba pynshit ne ka ba pynbitar.
Na ka liang u Special Director General of Police (law and order) u GP Singh lyngba ka twitter u la ong ba la kem noh ia kane ka samla namar ka don ka jingkhot na ka bynta ban hiar thma pyrshah ia ka ri lyngba ka Facebook post jong ka.
“Ha ba don ki ba pynpaw jingkyrshan ia ka kynhun ba la khein beain bad pynbna halor ka jingthmu ban hiar thma pyrshah ia ka ri, ngi don ia ka bor katkum ka ain ban pynshitom ia kum kita ki jait briew,” ong shuh shuh une u heh pulit.
