Shillong, Naiwieng 07: Ka jingtem ryntih ia ki 100 ksing ne 100 Drums kala sawa jam ha kylleng jongka Wangala A’dam ha Chibragre ha kaba la pynlong ia ka Hundred Drums Wangala Festival ha ka sien kaba 49, ka tamasa kaba heh duh jong ki jaidbynriew Garo ia kaba la rakhe da ka jingkmen bad ka jingiatylli.
Kila don 10 tylli ki shnong kiba la wan iashimbynta mynta ka snem ha kane ka tamasa kiba kynthup ia ka Tosekgre, Chidaogre, Rapdikgre, Chibragre, Dalbenggre, Wa’nok Damggre, Chepagre, Tura Wangala Troupe, Saldobra bad ka Gonddenggre.
Hynrei kawei hi kaba la ktik ia ki jingmut jingpyrkhat ha kane ka tamasa kadei ka jingwanphai jong ka shnong Tosekgre, kaba la long ka nongjop kaba nyngkong eh ha ka Hundred Drums Wangala ha u snem 1976, haba la pynlong ha ka sien kaba nyngkong eh ia kane ka tamasa.
Hadien 28 snem kata naduh u snem 1998, kane ka kynhun kala wanphai da ka jingjop bad ruh ban pynkynmaw biang ia ki jingsah jingkynmaw ia ka jingriewspah bad ia ka jingdon nam jong kane ka tamasa bad ka kolshor tynrai.
Mynta kadei ka sngi Baar jong kane ka Tamasa. U Myntri Rangbah ka jylla u Conrad K. Sangma ula plie ia kane ka tamasa ha ka sngi Palei.
U Rev Dilseng M. Sangma bad Rev Fr. Januarius S. Sangma kila ialam da kaba buh ha ki jingduwai na ka bynta ka jingsuk bad ka jingkmen bad hadien kane la pynbud pat da ka jingrwai ia ka Wangala Theme Song kaba la tip kum ka “DimDim Dimchong Dachichong.
Haba ai jingkren ha ka jingplie ia ka tamasa, u Conrad ula ong, ba ka Wangala Festival ha u snem ban wan kan kynjoh sha ka jingdap 50 snem ne Jubili Ksiar bad ban pynlong ia kane kaba heh kumta ia ka tamasa yn rakhe noh da ka “1000 Drums Wangala Festival” kaban long kaba nyngkong eh, kaban pyni ia ka dak jongka jingiatylli, jingkhlain bad ban pyniar ia ka kolshor da ka jingsngewsarong ia ka rilum Garo.
Ula pyntip ruh ba ka Sorkar Jylla kala shim ia shibun ki sienjam ban kyntiew ia ki kam wadbniah halor ka kolshor bad ka jinghiar pateng jong ki jaidbynriew riewlum ka Jylla bad pynpaw ba lyngba ka Chief Minister’s Research Grant, kala don ka jingwadbniah bad buh jingthoh ia ka kolshor, ka put ka tem bad ka jingleh tynrai jong ki riewlum ka Jylla.
“Haba jam shakhmat, ngi kwah ban wanrah shuh shuh ia ki sienjam ki ban kyrshan ia ka jingwad bniah ban lah pynneh pynsah ia ka kolshor. Ym tang ha ka jingthoh bad pynneh pynsah lyngba ki kot hynrei kan long ruh da kaba shna video” ula bynrap.
