Shillong, Nohprah 13: Ka Khasi Hills Autonomous District Council (KHADC) bad ka sorkar Jylla kala rai ban pynlong noh ia ka ‘Monolith Festival’ ha ka 1,2 bad 3 tarik Rymphang 2024 ha Khasi Heritage Village, Mawphlang.
Ia katei la pynbna da u Chief Executive Member ka KHADC u bah Pyniaid Sing Syiem haba kren sha ki lad pathai khubor, hadien ba la wai ka jingialang jong ka Executive Committee (EC) kaba la hynne ka sngi Balang.
U Bah Pyniaid Syiem, ula ong, ha kaba nyngkong la buh thong ban pynlong ia kane ka tamasa ha u bnai Nohprah 2023 hynrei hadien ba ka Council kala shong jingialang bad ka sorkar jylla kaban ai ka jingiatreilang ban pynlong ia katei ka tamasa, kila shim ia ka rai ban pynlong noh ia kane ka tamasa ha u snem ban wan.
Ula ong, ka daw kaba la pynlong ban shim ia ka rai ban pynkynriah iaka tarik ban pynlong iaka tamasa shaduh u bnai Rymphang kadei namar ba la bun palat ki prokram jong ka sorkar kaba kynthup ia ka Meghalaya Games, Meghalaya Day bad ka Republic Day kiban long ha u bnai ban wan.
