Shillong, K’lyngkot 16 : U Myntri Rangbah ka Jylla Conrad K Sangma ula pynbna ba ka Sorkar Jylla ka don jingthmu ban wanrah noh ia ka kaiphod ka Expert Committee halor ka State Reservation Policy, ha ka Dorbar Mang tyngka ban wan jong ka Iingdorbar Thaw Ain, kaba la tyrwa ban long ha u bnai Rymphang.
Kane ka Dorbar Mang tyngka kan sdang naduh ka 16 tarik Rymphang haduh ka 27 tarik Rymphang.
Haba iakren bad ki nongthoh khubor hadien ka jingialang jong ka Kynhun Myntri ha ka sngi Thohdieng, u Conrad ula iathuh b aka Kynhun Myntri kala iakren halor ka kaiphod jong ka State Reservation Policy bad la tyrwa ruh ba ka Dorbar Mang tyngka jong ka Iingdorbr Thaw Ain kan sdang ha ki pdeng taiew u Rymphang.
“Halor kane ka jingtyrwa, ka Kynhun Myntri kala rai ruh ba ka sngew dei eh ba kan wanrah ia ka kaiphod jong ka Expert Committee ha kane ka Dorbar Mang tyngka” ula ong.
U Myntri Rangbah ula ong ruh ba ka Sorkar kala tyrwa ia ki sngi shong Dorbar mang tyngka naduh ka 16 tarik haduh 27 tarik Rymphang bad mynta ka ap ia ka jingmynjur u Lat.
“Ngi la tyrwa sha u Lat bad ngi dang ap ia u Lat ba un khot ia ka Dorbar ka Iingdorbar Thaw Ain. Shisien ba u Lat ula ai jingmynjur bad pynmih ia ka hukum, ka Dorbar kan long ha kine ki tarik bala tyrwa” ula bynrap.
