Shillong, Naitung 16: Ka Meghalaya House ha Bengaluru kadei kaba la khmih lynti ba kan long ka jaka kaba kongsan ban kyrshan ia ki nongshong shnong ka jylla kiba sah ha katei ka sor, ban ai jaka sah, jingkyrshan bad ka jaka ban pyniasoh bad ka sorkar jylla.
Kane ka jaka kaba la angnud la slem bha, shen kan sa treikam pura noh hashwa ban kut une u snem, la ong u Myntri ka pule puthi u Rakkam A. Sangma hynne ka sngi Balang.
Haba iakren bad ki nongthoh khubor, u Sangma ula ong ba ka kynhun myntri kham hashwa kala dep ban mynjur ban thied ia ka jaka bad ia ka iing paki dulan ha Bengaluru bad kane ka kam kala jan poi sha kaban pyndep noh.
“Lada ngam bakla, ha kine ki 2-3 bnai kiban wan ne ha u Naiwieng ne ha u Nohprah, dei ban sdang pyntreikam noh ia ka Meghalaya House ha Bengaluru” ula ong.
Ula ong, ba ia baroh ki kam ki jam kiba iadei bad ka pisa pilain lah dep ban pyndep lut bad yn sa aiti noh tang shu dep ban pynbit pynbiang ia ki jingdon jingem kiba don hapoh.
Kane ka jingpynbna u Myntri Sorkar kala wan hadien katto katne sngi ba ka Khasi Students’ Union (KSU) Bengaluru Unit, kala bteng ban dawa ban pyntreikam noh mardor ia ka Meghalaya House.
Ka seng hapoh ka jingialam u President u Donboklang Nongphud, ula pynpaw ia ka jingeh kaba mad da ki samla pule bad ki briew ka jylla kiba trei ba ktah ha katei ka nongbah bad kila pynpaw ruh iak a jingsngewkhia halor katei ka jingslem.
