Kohima, Naiwieng 29 :Ki nongialam jong ka Seng Eastern Nagaland people’s organisation (ENPO) kila pynkhreh ban pynlong ka jingiakynduh ia u Myntri ka sorkar pdeng u Amit Shah ha ka 3 tarik u Nohprah u ban wan ban iakren ha kaba iadei bad ka kam kaba la sahteng la slem, kata halor ka jingdawa ban pynioh la ka jong ka jylla ‘Frontier Nagaland.’
Haba kren sha ka lad pathai khubor, u president ka ENPO u Tsapikiu Anar ula ong ; “Ngi la lah ioh ban pynbeit ia ka sngi ban iakynduh ia u Amit Shah ha ka 3 tarik u Nohprah 2022 bad ban iakren halor ka mat kaba la sahteng la slem ha kaba iadei bad ka jingdawa ban pynioh noh la ka jong ka jylla.”
Kham hashwa ha u bnai Risaw ba la dep, na ka liang u Myntri Rangbah (CM) ka Nagaland u Neiphiu Rio ula ong ba un pynkhreh na ka bynta ka jingiakren hapdeng u Myntri ka sorkar pdeng u Amit Shah bad ki nongmihkhmat na ka liang ka Eastern Nagaland Peoples’ Organisation.
Haba kren sha ki lad pathai khubor, u CM ka Nagaland ula ong; “Ngi la iakren bad ki bad ngin iarap ruh ia ka ENPO na ka bynta ban iakynduh ia u Myntri kam pohiing ka sorkar pdeng, bad lada u Myntri Rangbahduh (PM) ruh un wan ryngkat lang kumta ruh ngin buh ka jingkyrpad ha kaba iadei bad katei ka mat.”
“Kum ki Naga ngi kren naduh ka mynsiem bad kam long kaba bakla na ka bynta jong ki ba kin kren halor kaei kaba ki pyrkhat bad kaei kaba ki angnud, hynrei ia baroh kine ki mat yn sa lah ban ia pynbeit,” ong shuh shuh u CM ka Nagaland.
Ha kawei pat ka bynta, namar ka jingpulom jong ka sorkar jylla ban pynsngap ia ka jingdawa jong ka seng, na ka liang jong ka Seng Eastern Nagaland Women Organisation kala shim ia ka rai ban kyrshan ia ka jingshim rai jong ka ENPO da ka ban ym iashim bynta ha ki ilekshon ka jylla.
Na ka liang ka A. Shamthai Phom president ka ENWO bad ka M. Chongthen, media secretary kila pynpaw ba ia katei ka rai la shim hadien ka jingpynlong ia ka jingiamit jingmut bad baroh ki hynniew tylli ki kynhun seng jong ki trai shnong kaba la long hapoh Tuensang HQ.
Ka Eastern Nagaland People’s Organisation (ENPO) kala bteng ia ka jingdawa ban pynioh la ka jong ka jylla ‘Frontier Nagaland’ nalor ka jingpynsangeh ia baroh ki jingialap ilekshon da kino kino ki party bad halor ka jingpynbna ia kino kino ki kyrtong hapoh ki jaka puta kiba hap hapoh jong ka.
Da kaba khot ia baroh ki hynniew tylli ki kynhun seng jong ki trai shnong, ka ENPO kala shim ia ka rai ba ki nongshong shnong jong ka Eastern Nagaland kin ym iashim bynta ha kino kino ki jingpynlong ilekshon jong ka jylla bad ka sorkar pdeng bad tad lada la lah ban pynurlong ia ka jingdawa ka jong ki ban pynioh la ka jong ka jylla ‘Frontier Nagaland.’
