Shillong, Rymphang 16: U Myntri ka Sorkar Jylla uba khmih ia ka tnad Bording u Abu Taher Mondal, ula ong, ha u Bnai Lber yn pynhiar ne kyntiew ia ka jingkieng Umiam ne Damsite, hynrei haduh mynta ym pat lah ban rai ia ka tarik namar ba ka jingmaramot ia katei ka jingkieng ka dang iaid shakhmat.
“Ngam pat lah ban pynthikna ia ka tarik, hynrei kan dei hapoh ka 15 tarik u Lber mynta u snem” la ong u AT. Mondal.
Ula ong ba ka tnad Bording kan hap ban shong jingialang shwa bad ka Technical Committee bad ka Co-ordination Committee hashuwa ban pynbna ia ka tarik ban khang iaid ia ki kali na ka jingkieng Damsite.
U Mondal ula ong, ynda la dep ban shong jingialang bad Technical Committee bad ka Co-ordination Committee yn sa pyntip shwa iaka rai sha ka kynhun Myntri Sorkar ban ioh ka jingmynjur ne ia kino kino ki jingai jingmut halor katei ka kam.
Halor ka jingkhang ban iaid kali nalor jingkieng Damsite, u Myntri Sorkar ula ong, ba ka jingkhang iaki kali ban iaid nalor ka jingkieng kan dei haka por ba rah iaka jingkieng bad kane kan neh kumba 4 haduh 8 kynta eiei bad wat ha ka por ba pynhiar iaka jingkieng ruh kan don ka jingpyrkhing iaki kali ban iaid katto katne kynta.
U Mondal ula ong, ba ka tnad kan sa pyntip paidbah ia ka tarik ban khang iaid kali na ka jingkieng bad ia kane yn sa leh tang hadien ba la dep ban shim ia ka rai.
