Shillong, Iaiong 21: U Nongialam ka United Democratic Party (UDP) bad MLA ka Nongpoh Bah Mayralborn Syiem hynne ka sngi thohdieng, ula ong ba ka dang don bun ka lad ka lynti ban shong bishar thymmai ia ka Memorandum of Understanding (MoU) bala iasoi hapdeng ka Meghalaya bad ka Assam haba iadei bad ki hynriew tylli ki jaka iakajia jong ki artylli ki Jylla.
U Bah Mayral haba iakren bad ki nongthoh khubor ula ong ba ka MoU bala iasoi ha ka 29 tarik Lber 2021, kam pat dei kaba kut bad ong “(Ka dei namar) ka Iingdorbar Parliament kan sa shim ia ka rai ba khatduh ia ka kam. Ta ka daw, ka dang don bun ka lynti ban shong bishar thymmai ia ka MoU”.
Ula ong ba ka jingbishar biang ia ka MoU ka dei kawei na ki mat ba hakhmat jong ka UDP ha ka election manifesto. “Kum kawei na ki Dkhot jong ka MDA-2, ngi hap ban pynleit jingmut ruh halor ka Common Minimum Programme kaba baroh ki manifesto jong ki party kin iadonlang khnang ba ngin lah ban jam shakhmat” ula bynrap.
Haba kylli ba u Myntri Rangbah Conrad K Sangma ula dep kren skhem ba kan nym don shuh ka jingbishar biang ia ka MoU, une u MLA ka UDP ula ong “Ka por kan sa batai”.
Ula ong ba ka wat ba nyngkong jong ka jingiakren pud kala sakhi ia ka jingpyrshah na kiba bun ki kynhun ka imlang sahlang namar ki paidbah kila pynpaw ia ka jingbym sngewhun.
“Ki Regional Committee jong ka Sorkar ruh kila pyrshang ban pynbeit ia kane ka kam kat kaba lah hynrei kane ka dei ka kam kaba phim lah ban pynbeit shisien pynbeit nab aka dei ka kam kaba phim lah ban pynhun 100 na ka 100. Kan don beit ka jingbym hun namar kin don ki briew kiba kmen bad kin don kiba sngewsih hynrei haba kut ka sngi, ka Sorkar kan hap ban shim iala ka jong ka nongrim” ula bynrap.
Haba iaroh ia ka Sorkar MDA ba ka shimkhia ban pynbeit noh shisyndon ia ka jingiakajia khappud, u Bah Mayral ula ong “Ka MDA-I kala pyrshang bad mynta ngi kwah ia ka jingkyrshan jong ki paidbah ruh namar ngi sngewthuh ba ha ka riti synshar paidbah, ki jingkynthoh pyrshah kin don beit hynrei nga kwah ban ai jingmut ha kaban don ka jingkynthoh kaba tei”.
Ula kular ba ka UDP kan buddien ia kane ka kam bad kan iatreilang ha kti ha kjat bad ka Sorkar na ka bynta ka jingmyntoi jong ki paidbah haba pynpaw ruh ia ka jingsngewskhem ba ka Common Minimum Programme kan sa don ha ka Sorkar MDA-2.
Nalor kane, u Bah Mayral ula pynpaw ia ka jingdonkam ba ka Sorkar kan shim ba kino kino kiba iadei bad ka kam khappud ka dei ban iaid kat kum ka Para 20 jong ka Sixth Schedule ka Riti Synshar ka Ri India.
Ula pyntip ruh ba ki Regional Committee kin sa iakynduh shen ban iakren halor ka wat ba-ar jong ka jingiakren pynbeit pud jong ki 6 tylli ki jaka ba dang sah.
