Shillong, Iaiong 17 : Ka Sorkar Meghalaya bad Assam ki lah ban sdang noh ia ka jingiakren pynbeit pud jong ka kylla kaba ar ha u bnai Jymmang, na ka bynta ban iapynbeit noh ia ka jingiakajia ha ki hynriew tylli ki jaka ba dang iakynad hapdeng kine ki ar Jylla.
Haba pyntip ia kane hynne ka sngi Nyngkong, u Myntri Rangbah ka Jylla Conrad K Sangma ula ong “ Ha u bnai Jymmang, ngin pyrshang ban pynlong ia ka jingialang ba nyngkong lane pynbteng ia ka kylla ba bud jong ka jingiakren pynbeit pud. Ai b aka por kan wan, Nga khmih lynti ba lehse ha u bnai Jymmang, ngin lah ban iohi ia ka kylla ba –ar jong ka jingiakren pud”.
Ha ka 24 tarik Lber, ka Sorkar Jylla kala thaw ia lai tylli ki Regional Committee ki ban shong bishar ia ka jinglong jingman ba mynta jong ki hynriew tylli ki jaka bym pat pynbeit satia ia ka jingiakajia bad ban aiti ia ka kaiphod hapoh ka 45 sngi.
Kine ki hynriew tylli ki jaka ki kynthup ia ka Langpih ha West Khasi Hills District, Borduar, Nongwah-Mawtamur, Deshdoomreah, Block-II kiba hap ha Ri-Bhoi bad ka Block-I, Psiar-Khanduli kiba hap ha West Jaintia Hills District.
Ki arngut ki Symbud Myntri Rangbah-bah Prestone Tynsong bad bah Sniawbhalang Dhar kin khlieh ia ka Regional Committee ka Ri-Bhoi bad West Jaintia Hills District katba u Myntri Sorkar bah Paul Lyngdoh un long u Chairman jong ka Regional Committee ka West Khasi Hills District.
