Shillong, Jymmang 29 : U Myntri Rangbah ka Jylla Conrad K Sangma bad u Myntri Rangbah ka Assam Himanta Biswa Sarma, kin sa iashong jingialang jong ka wat ba-ar, ban iakren pynbeit ia ka jingiakajia pud ha ki 6 tylli ki jaka ba dang sahteng ha ka 2 tarik Jylliew.
Haba pyntip ia kane ha ka sngi Balang, u Chief Secretary ka Jylla Bah DP Wahlang ula ong “Ngi dang bteng ia ka jingiakren bad ka jingialang ban wan jong ki Myntri Rangbah kan long ha ka 2 tarik Jylliew”.
Hynrei ula ong ba ki lai tylli ki Regional Committee kin dang ban aiti ia ki kaiphod jong ka wat kaba ar, namar “Ka kham kyllain khyndiat haba phai sha ka Block-I, II bad ka Langpih”.
“Ki (Regional Committee) donkam kham bun ka por bad ngi la ai ia ka por ha ki hynrei ka jingialang ban wan hapdeng ki Myntri Rangbah kan long eh ha kaban pynbeit ia ki jingiapher jingmut, ki jingeh ba ngi iakynduh ha ka wat kaba nyngkong bad ba ar, kan long ha ka 2 tarik Jylliew ha Guwahati” ula bynrap.
Halor ka jingdawa ban pynphai biang ia ka Block-I, II sha Meghalaya, u Chief Secretary ula ong “Kane kan long shibynta jong ki mat kiban iakren bad ka Assam. Ngam lah ban ong eiei kum u riew shimet ia mynta hynrei ynda la iashong jingia lang hapdeng ki Myntri Rangbah bad ki Heh Ophisar, kine kin dei ki kam ki ban sa iakren bad iathir bha”.
