Shillong, K’lyngkot 15 : U Myntri Rangbah ka Jylla Conrad K Sangma ha ka sngi Palei, ula pyntip ba ka project ban shna pynheh ia ka Shillong Airport kala iaid shakhmat mynta wat hapdeng ka jingiatakhuh ia ki katto katne ki jyrwit jyrwat.
“Ki kam ki jam kila iaid ha ka lynti kaba dei…ka dei ka kam kaba kyllain bha kaba donkam ia ka jingtuklar ha ki kyrdan bapher bapher bad ki kynhun bapher bapher kiba don bynta ha ka kam” ula ong.
U Conrad ula kren halor ka kam jaka bala pynsngew dang shen da ka Directorate General if Civil Aviation (DGCA), ba iadei bad ki jingsngewkhia halor ki jingshngain, ia kiba ka Sorkar kala shimkhia ban pynbeit.
“Sa kawei ka kam jaka kala mih biang, kaba ngi la pyrshang ban pynbeit mynta….ka jingshngain jong ki liengsuin bad ka jingshngain jong ki briew bas ah ha ka thain, ka dei ka bynta ba hakhmat eh jong ngi” ula ong.
U Myntri Rangbah ula pynpaw ia ka jingsngew skhem ba kane ka project kan nym slem palat, haba khmih lynti ba ki jingpyntrei ia ki kam kin sa sdang noh shen.
“Ngim khmih lynti ban don ka jingslem haduh katta katta ha ka kam…shisien bala dep kane ka bynta, ka jingpyntrei ia ki jingtei kan sa sdang bad katba ki jingtei ki dang iaid, ngin dang wad ia ki lad ki lynti ban pynbeit ia kiwei pat ki jingeh ba sahteng” ong u Conrad.
U Conrad ula pynbna ba ka Sorkar ka thmu ban pyndep ia kane ka project hapoh u 2027, da ka jing khmih lynti ba ki liengsuin kiba heh kin sdang ban her na kane ka kad naduh u bnai Rymphang-Lber 2027.
