Shillong, Risaw 26 : Ka Sorkar Meghalaya Democratic Alliance (MDA), kala rai ban tei ia ka National Law University (NLU) ha Mawpdang-Mawkhanu, kaba hap hapoh ka New Shillong Township.
Ka Tnad Urban Affairs ka Jylla, kala ai ia ka bhah jaka ha New Shillong Township ban lah pynsdang noh shaid shaid ia ki jingtei jong kane ka University.
U Myntri Rangbah ka Jylla Conrad K Sangma, ha ka 30 tarik Risaw, yn sa aiti noh ia kane ka jaka sha u Chief Justice ka Jylla Sanjib Banerjee uba dei ruh u Chancellor jong ka National Law University, ha ka jingialang ka ban long ha Mawpdang Mawkhanu.
Lah ban kdew hangne, ka Sorkar MDA ha ka 4 tarik Naitung, kala shim ia ka rai ban wanrah noh ia ka National Law University ha Jylla. Kane ka rai kala mih na ka jingialang jong ka Kynhun Myntri hadien ka jingmynjur ia ka National Law University of Meghalaya Ordinance, 2022.
Hadien kane ka rai, u Myntri Rangbah ka Jylla ula plie paidbah ia kane ka University ha ka jaka pule kaba shipor kaba don ha Mayurbhanj Complex, Shillong.
Ha katei ka jingialang la iadonlang u Chief Justice ka Meghalaya High Court, u Sanjib Banerjee, u Myntri ka pule puthi u Rakkam A Sangma bad Vice Chancellor jongka University, Prof Indrajit Dube.
Ka sorkar jylla kala bhah T. 25 Klur ban pynbiang iaki jingdonkam baroh ha katei ka jaka pule kaba shipor.
Haba kren ha ka jingialang u Conrad Sangma, ula banjur iaka jingkongsan ban buh jingthoh kyrpang bad ban pynlong aiñ ia ki aiñ ki kanun kiba la don bad bud lypa naduh ki por mynshwa da ki riewlum bad ula pynpaw ruh ba ka NLU kadei ban long kum ka jaka pule kaba kongsan ban leh iaki jingwad bniah ha kaba iadei bad ki aiñ kiba ka don lypa naduh ki por hyndai hynthai haka thain shatei lam mihngi.
Pule lang ia kane: Hap mih u VC ka NEHU ban kren ia ka jingeh ki samla pule naba shah kerkut
Peit lang ia kane
