Shillong, Nohprah 18: Ka Khasi Authors Society – Khliehriat Unit hynne ka sngi Nyngkong, kala pynlong iaka jingkynmaw burom ia ka lyngkhuh sngi ïap ba 83 jong u Soso Tham ha ryngkat ka jingiatreilang bad ka Khasi Department ha Jaiñtia Eastern College, Khliehriat, East Jaiñtia Hills.
Ka KAS kaba la seng 44 snem mynshwa ka ieng ban kyntiew ia ka ktien Khasi bad ka KAS ka don 7 tylli ki Unit ha kylleng ki bynta jongka jylla Meghalaya.
U MP ka Rajya Sabha u Dr. WR Kharlukhi ula long kum u kongsan katba u Myntri Sorkar uba khmih iaka tnad Revenue and Disaster Management u Bah Kyrmen Shylla ula long u symbud kongsan.
U Bah Kyrmen Shylla ula ai khublei bad kitbok ia ka KAS bad ia ka jingdawa ka jongka bad kajaidbynriew ba kan urlong noh, ha kaba ia ka ktien Khasi yn pynrung noh ha ka Khyrnit kaba Phra jong ka riti synshar ka ri.
Ula pynkynmaw ruh ia ki por kiba mynshwa ba kum u khynnah skul ba u ju pule ia ki poiti kiba thoh u Soso Tham kiba ai mynsiem bha bad kiba kit jingmut.
U Dr Kharlukhi ula ong ba kane kadei ka sngi kaba baroh ki kynmaw ia u Soso Tham uba mihkhmat iaka rilum Khasi bad Jaiñtia bad kum u nongthoh poitri ula pynshlur bad ai mynsiem ia kiba bun mynta daki phew snem.
Ula ong ruh, hadien ba la mynjur ia ka Resolution da ka ïingdorbar thawaiñ ka jylla, ki 3 ngut ki MP ka jylla Meghalaya kila banjur ban pynrung noh ia ka ktien Khasi bad Garo ha ka Eight Schedule jong ka riti synshar ka ri.
Ha katei ka jingialang la pyllait paidbah ruh ia ka kot kaba la ai kyrteng “Shi Hara Ki Sur Myllung Bad ki Essay” kaba la thoh da u samla pule jongka Jaiñtia Eastern College bad la pynbeit bad khmih bniah da u Dr. Davidson Diengdoh.
