Shillong, Nailur 2: U National President ka Nationa People’s Party (NPP) bad Myntri Rangbah ka jylla Conrad K Sangma, ha ka sngi Nyngkong u la ban jur ia ka jingaiti lut ba khlem pud jong ka party ban pynleit jingmut ha ka kam sain pyrthei kaba bha, ka jingiatylli, bad ka jingshakri ia ki paidbah kum ki bor ban pyntyllun shakhmat ia ki mishon ban pyniaid shakhmat ia ka Jylla Meghalaya.
Haba kren ha ka jingrakhe ia ka lyngkhuh sngi kha ba 77 jong u (L) Purno A Sangma, u MP Lok-Sabha barim bad Myntri Rangbah barim, u Conrad ula kren shai ba ka NPP ka ngeit ha ki kam kiba bha bad ka sain pyrthei kaba bha.
U la pynpaw ba um lah ban iaishah ia ka jingmut ba sniew bad u la khot ia ki riew shimet, ki briew, ki kynhun bad ki seng sain pyrthei kiba ngeit ha ka jingpyniapait iapra ia ka imlang sahlang, kiba ngeit ba lehse ban phiah bad synshar ka dei tang ka lad ban iaid shakhmat.
“Ngin ym lah da lei lei ruh ban tei ia ka imlang sahlang jong ngi da ki jingmut kiba sniew.
Ngim ym lah satia ban pyniaid ia ka jylla jong ngi shakhmat. Ka jingmut kaba sniew hi kan ialam tang sha ka jingjot ia ka imlang sahlang jong ngi bad ia ki briew jong ngi bad ia ka jylla jong ngi. To ai ba kane kan long kaba shai. Ka National People’s Party ka ngeit ha ki kam kiba bha bad ka sain pyrthei kaba bha. Ngim nym ngeit satia ha ka jingmut kiba sniew bad ka politiks kaba sniew. Ka dei ka jingmut kaba bha ka ban btin lynti ia ngi. Ki don ki riew shimet, ki briew, ki kynhun, ki seng kiba ngeit ban phiah/pyniapait iapra ia ka imlang sahlang jong ngi, kiba ngeit ba lehse ban phiah bad synshar ka dei tang ka lad ban iaid shakhmat. Ngam lah ban iashah ia ka sain pyrthei kaba pyniapait iapra,” u la ban jur.
Haba kren sha ki nongïalam bad ki nongtrei jong ka party kiba la ïadonlang kynthup ïa u National Vice-President & Symbud Myntri Rangbah ka Jylla bah Prestone Tynsong, u Symbud Myntri Rangbah Bah Sniawbhalang Dhar, bad kiwei kiwei ki nongïalam ka party, ha U Soso Tham Auditorium, u Conrad ula iai ban iaki nongrim ba kongsan kiba ïalam ïa ka NPP, kaba la seng da u Purno Sangma ha u snem 2013.
Haba pynpaw ia ki jinghikai jong u kpa jong u, u Purno A Sangma, u Conrad u la iasam ia ki jinghikai kiba kordor kiba iai bteng ban ialam lynti ia ka jinglong nongialam jong u. U la pynkynmaw ba u kpa jong u, u ju ong ia u ba u dei ban shah ialam da ka jingthrang ban iarap bad shakri ia ki paidbah, ym ban pyrkhat ia ki jingmyntoi ne kano kano ka kyrdan.
Ula ong ba Ka sain pyrthei kaba pynshong nongrim ha ki paidbah, kan wanrah ia ki jingkyrkhu na ki paidbah, ki ban duwai na ka bynta jong phi, bad kyrshan ia phi.
“Paralok, ai ba kane kan long kawei na ki mat ne ka nuksa kaba khraw tam ba ngi dei ban shim, nga dei ban ong, naduh kane ka sngi ba seng nongrim ia ka party, ba ai ba ka sain pyrthei jong ngi kan shah ialam lynti da ka jingdonkam ban shakri ïa ki paidbah jong ka jylla jong ngi. Ai ba ka jingiatiplem jong ngi kan long kaba shai”, u la ong.
U la kyntu ruh ïa ki paralok bad ki dkhot jong ka party ba kin ïaineh ha ka nongrim bad ban iai kynmaw beit ïa ka jingdonkam jong ka jingsngewrit ha ka jinglong nongïalam. “Ka jingsngewrit kan ialam ia phi sha ki jaka ba phim lah ban mutdur,” u la ai jingmut haba pynkynmaw ia ki ba wat la ki kiew sha jrong katno katno ruh ha ka sain pyrthei, kim dei ban klet ia ki tynrai jong ki lane ia ki briew kiba kyrshan ha ka lynti iaid jong ki.
U Myntri Rangbah u la kren ruh halor ka jingdonkam jong ka jinglah ban iakynduh bad ka jinglah ban ai jubab ha ka synshar khadar. U la kubur ïa ki jingeh ban ïalam ïa ka jylla kaba rit kum ka Meghalaya, ha kaba ka jingjan jong ka sorkar bad ki paidbah ka donkam ïa ka jingïatreilang bad ka jingïasyllok man ka por. Hynrei u la ithuh ruh ia kane kum ka jingkhlain, kaba pynlah ia ka sorkar ba kan leh eiei halor ki jingdonkam bad ki jingeh jong ki nongshong shnong jong ka.
Ka NPP ka la rakhe ruh ïa ka sngi seng nongrim kaba 12 ha katei ka prokram. U Conrad ula kubur ia ki jingeh kiba ap ha khmat hynrei u la pynskhem biang ia ka jingaiti jong ka party ban shakri ia ki paidbah ka jylla Meghalaya da ka jinglong ba janai bad ka jingaiti lut.
“Ngin sa leh katba lah ban pynthikna ba ha ka jingmut jingpyrkhat, ka dohnud bad ka jingsngew jong ngi, ym don kaei kaei pat lait na ka jingbha jong ki briew jong ngi kaba dei ban ialam lynti ha kaei kaba ngi leh ha ki por ban wan,” u la pynkut.
 bad Myntri Rangbah ka jylla Conrad K Sangma, ha ka sngi Nyngkong u la ban jur ia ka jingaiti lut ba khlem pud jong ka party ban pynleit jingmut ha ka kam sain pyrthei kaba bha, ka jingiatylli, bad ka jingshakri ia ki paidbah kum ki bor ban pyntyllun shakhmat ia ki mishon ban pyniaid shakhmat ia ka Jylla Meghalaya.){kind=link}