Baksa, Rymphang 17: Ka Bodoland Territorial Region (BTR) kala pynlong ia ka International Wildlife Conference kaba nyngkong eh, ha ka Baksa District jong ka jylla Assam.
Kane ka International Wildlife Conference, 2024 kaban long 3 sngi, kala sdang ha ka sngi Thohdieng ha kaba la pynlong ia ki prokram bapher ha Bansbari, Manas Tiger Reserve jong ka Baksa.
Ka Tnad Forest & Environment jong ka BTR kaba la pynlong ia kane ka prokram kala banjur ia ka jingdonkam ban pynsngewthuh paidbah ban pynneh pynsah bad ban iada ia ki khlaw ki btap bad ia ki mrad ha ka thaiñ Bodoland.
U Chief Executive Member jongka Bodoland Territorial Region (BTR), u Pramod Boro kum u kongsan ula plie ia kane ka jingialang ryngkat bad u Executive Member uba khmih ia ka tnad Forest & Environment u Ranjit Basumatary bad kiwei kiwei.
Kumba 15 ngut ki riewshemphang kynthup ia ki 4 ngut ki riewshemphang kiba la pawnam na ka ri Bhutan, Italy bad Bangladesh kila wan ban iashimbynta ha katei ka Conference bad kumjuh na ki jylla jong ka thaiñ shatei lam mihngi jongka ri.
