Shillong, Naiwieng 08: Ka Tournament Committee jongka Meghalaya State League 2024 kala pynthikna ia ki 8 tylli ki kynhun kiba la ioh rung sha ka Quarterfinal jong katei ka jingiakob ialehkai Football.
Ha kane ka jingiakob kaba la pynlong da ka Meghalaya Football Association, yn sakhi ia ka jingiakhun ia ka Quarterfinal kaba lai, hapdeng ka Rangdajied United kaba dang bat ia ka nam lahduh pyrshah ia ka Shillong Lajong kaba la long ka lahduh ka MSL ha u 2019.
Ka Lajong kala pynrem ia ka Rangdajied ha ka final kaba la long ha u snem 2019 ban ioh rah ia ka khusnam ha Khliehriat katba ka Rangdajied kala pynrem ia ka SLFC ha ka Semifinal kaba la long ha u snem 2023.
Kan don ruh ka jingiakhun hapdeng ki kynhun kiba na rilum Jaintia hapdeng ka Sutnga kaba na East Jaintia pyrshah ia ka Ladthadlaboh na West Jaintia ha ka quarterfinal kaba ar. Katba ka Rymbai Skhenshynriah kan iakhun pyrshah ia ka Chipakkore ha ka quarterfinal kaba nyngkong eh.
Ka Mawlai kan iakhun pyrshah ia ka Khliehmawlieh ha ka quarterfinal kaba saw. Ka Khliehmawlieh kala pynrem teng iaka Mawlai ha ka jingiakhun ia ka Semi Final jong ka MSL 2023 kaba la long ha Shillong hynrei kala shah pynrem noh ha ka Rangdajied ha ka jingiakhun ha ka Final.
Ka Tournament Committee kan sa pynbna ia ka tarik bad ia ka por na ka bynta kitei ki jingiakhun jong ka Quarterfinal.
Dang shen ka MFA kala rai ban pynsangeh shwa shipor ia ka jingpynialehkai iaka MSL ban ailad ia ki nongialehkai kiba mihkhmat ia ka jylla ban pynleit jingmut ha ka jingleit iashimbynta ha ka Santosh Trophy 2024-25.
