Shillong, Risaw 23: Ka kyrtong jong ka Trinamool Congress (TMC) ka Sadhiarani M Sangma, hynne ka sngi Balang, kala leit thep kyrteng ban iakhun ia ka elekshon MLA shiteng samoi na Gambegre Constituency bad la ong ba kala pynpaw ba ka jingiakhun ha kane ka elekshon kan long beit thik hapdeng ka TMC bad ka National People’s Party (NPP).
Haba kyntait ba kan ym don kano kano ka jingktah ia ka jingpynieng kyrtong ka seng Congress, ka Sadhiarani Sangma kala ong, “Ka jingiakhun kan long beit hapdeng jong ngi (TMC) bad ka NPP kaba pynieng da ka kurim jong u Myntri Rangbah ka jylla. Kiba bun na ki nongialam bad ki nongkitkam ka Congress kila wan ban pyniasoh bad ngi”.
Yn pynlong ia katei ka elekshon shiteng samoi hadien ba u MLA ka Congress u Saleng A. Sangma ula iehnoh ia ka kam MLA hadien ba ula shah jied kum u Member of Parliament (MP) na Tura, dang ha une u snem. Ia kane ka elekshon yn pynlong ha ka 13 tarik u Naiwieng bad ka jingniew vote kan long ha ka 23 tarik u Naiwieng.
Ka kyrtong jong ka TMC kaba dei ruh ka kurim jongu myntri sorkar barim ka jylla u Zenith M Sangma, kala kythoh pyrshah ruh ia u MLA barim, ba ka constituency kala sakhi ia ka jingsahdien ha ki kam pynroi la bun snem.
“Palat ia ka 50% ha ka Gambegre kam don satia ia ki surok kiba biang. Ban kit ia kiba pang sha hospital ka long ka jingeh kaba khraw namar ka jingbym don ia ki surok. Don ki por ba hap ban sei noh ia ki nongpang na ka kali kit nongpang ban shu rah noh da kaba iaid kjat ban poi sha hospital,” kala ong.
Ka NPP kala pynieng da ka Dr Mehtab Chandi A. Sangma, ka kurim jong u Myntri Rangbah ka jylla u Conrad K Sangma, ban iakhun ia katei ka elekshon. Ka Dr Mehtab kan iakhun iaka elekshon ha ka sien kaba nyngkong eh, katba ka Sadhiarani Sangma kadei kaba la don iaka jingshemphang haka kam politik bad kadei ka MDC jongka Garo Hills Autonomous District Council (GHADC).
Ka Dr Mehtab Chandi A. Sangma kan leit ban thep kyrteng ha ka sngi palei.
Ka Sadhiarani Sangma kala dep iakhun arsien iaka elekshon na Gambegre constituency hynrei kam shym la jop bad kala mad ia ka jingshah pynrem ha u MLA barim u Saleng A. Sangma (Congress). Kane kan dei ka sien kaba lai ia ka ban iakhun biang na katei ka constituency.
Nalor ka TMC bad NPP, kin don sa 4 ngut ki kyrtong kiba don jingthmu ban iakhun ia katei ka elekshon.
Ka Congress kan pynieng ia u Jingjang M. Marak uba iajan bha bad u Saleng Sangma, katba ka BJP kan pynieng ia u MDC ka GHADC na Tura bad u State Vice President u Bernard N Marak.
Katba u Sengkrabirth Marak bad u Jerry A Sangma kila leit thep kyrteng ban iakhun ia ka elekshon kum ki kyrtong khlem seng.
U Sengkrabirth ula thep kyrteng haka sngi Baar bad u Jerry ula thep kyrteng hynne ka sngi Balang.
