Tura, Risaw 25 : Ka jingthep kyrteng jong ki kyrtong sha ka elekshon shiteng samoi ka Gambegre constituency kala kut noh hynne ka janmiet por 3 baje bad hynriew ngut ki kyrtong, kila mih ha lympung ban iakhun.
U Nipon Hajong, ADC Election (WGH) bad Returning Officer (RO) ka elekshon shiteng samoi ha Gambegre, ula pynbna ba 4 ngut ki kyrtong ki dei kiba mihkhmat na ki seng sain pyrthei bad arngut ki dei ki kyrtong shimet.
Ka jingbishar ia ki kot ki sla jong ki kyrtong kan long ha ka 28 tarik Risaw hashuwa ban pynbna ia ki kyrtong kiba la thikna ban ioh iakhun ia ka elekshon.
Ia kane ka elekshon yn pynlong hapoh kijuh ki kyndon jong ka General election bad ka Model Code of Conduct (MCC) kala treikam naduh ka sngi ba pynbna ia ka tarik jong ka elekshon, ong u RO.
Haba kylli ia ki Polling Station kiba don jingma ban mih ki jingpynthut ha Gambegre, u Hajong ula ong, haba khmih na ki elekshon bala dep, ym don satia kawei ruh ka polling station hapoh ka constituency kaba la iathuh kum kiba don jingma ban mih jingkulmar ne shah pynthut.
“Hynrei, lada mih kino kino ki kynrum kynram ha ka por ialap elekshon, ki nongpeit pyrman ba wan na ECI ki don ia ka bor ban leh eiei bad lada donkam, kin pynbun ia ki nongpeit pyrman ha man ki Polling Station” ula bynrap.
Ka Gambegre constituency ka don haduh 51 tylli ki Polling Station bad ki nongthep vote ki don haduh 31,439 ngut ha kaba 28,448 ngut ki dei kiba poi thep vote ha ka elekshon MLA 2023.
