Shillong, Naitung 5: Ka Meghalaya Basin Management Agency, jong ka sorkar jylla ryngkat ka jingiatreilang bad ka Observer Research Foundation (ORF) ka Think20 (T20) Secretariat hapoh jong ka India’s G20 Presidency kan pynlong iaka Think20 Conference kaba la ai kyrteng “Nature Solves: A New Framework for Our Sustainable Future” ha nongbah Shillong naduh ka 5 haduh ka 7 tarik u Naitung, 2023.
Ka Think20 (T20) kadei ka kynhun kaba don bynta bda ka G20 kaba trei ha kaban wanrah iaka jingiatreilang na ki riewstad bad riewshemphang ban iatai halor ki mat kiba iadei bad ki polisi jong ka G20.
Ka jingthmu jong katei ka jingialang kaba 3 sngi ka long ban lum ia ki kynhun na ka Ri bad nabar ri ban iatai bad ban thaw ia ki lad ki lynti kiban pynshlur ia ka jingieid mariang ha ka Ri India bad ki Ri ba wan iashimbynta, kaba lah ruh long ka nuksa ia kiwei ki ri ka pyrthei.
Ki nongthaw polisi,ki nonghikai, ki heh ophisarbad ki riewshemphang na kylleng ki agency kiba mihkhmat haka G20 kynthup iaka ADB, World Bank, UNICEF, UNESCO, UNDP bad TIPS, kin wanlang ha kawei ka rynsan ban iasyllok bad ai jingmut mar kylliang bad ban iatreilang naka bynta ban weng ia ki jingeh kiba bun rukom kiba iadei bad ka green growth, women-led development, climate finance bad kiwei kiwei.
Palat 60 ngut ki nongkren na kylleng ki ri kin iashymbynta haka jingialang ha kaba kin iatai bad ai ia ki jingai jingmut ki ban long kum ka jingnoh synniang na ka bynta ban pynwandur pura iaka “Meghalaya Manifesto,” kaba dei ka polisi treikam ban iada ia ka mei mariang khamtam ha kaban iakhun iaka jingkylla ka suinbneng.
Ia kane ka Conference yn plie da u Myntri Rangbah ka jylla u Conrad K Sangma bad yn ioh ruh iaka jingkren maitphang na u Bah D.P. Wahlang uba long u Chief Secretary ka jylla, u Eenam Gambhir u Joint Secretary (G20) ha ka Ministry of External Affairs, jongka sorkar pdeng bad Samir Saran, T20 Chair bad President jongka Observer Research Foundation, India.
Kiwei pat ki dkhot kiba pawkhmat kiban wan iashimbynta kin kynthup ia u Shombi Sharp, United Nations Resident Coordinator ha India bad u Federico Salas Lotfe, Ambassador ka Mexico sha ri India bad kiwei kiwei.
Pule lang ia kane: Pyllait ka Sorkar T. 12.44 klur ban siew ia ki arrear tulop ki Nonghikai SSA
