Shillong, Iaiong 07 : U National President ka NPP bad Myntri Rangbah ka Jylla Conrad K Sangma, hynnin ka sngi Saitjain, ula pynkut ia ka jinghiar ialap elekshon ba lai sngi lynter na ka bynta ki kyrtong ka NPP ha Arunachal Pradesh, ka ban leit sha ka elekshon Assembly (MLA) ha ka 19 tarik Iaiong ha ryngkat ka elekshon Lok Sabha.
Ha kane ka jingleit ialap elekshon, u Conrad ula leit iuhkjat ha Longding, Leparada bad Dumporjio ha Arunachal Pradesh. La synran ia u da ka kurim bad National Treasurer ka NPP Dr Mehtab Agitok Sangma bad u National General Secretary i/c Organization James K Sangma.
Haba kren ha ki rynsan ialap elekshon bapher bapher, u Myntri Rangbah Conrad K Sangma ula ong ba ka NPP ka lah ban dei ka paralok ba iatreikam ha ka Sorkar synrop NDA hynrei haba iatakhuh bad ki ishu jong ki paidbah ka thain Shatei Lam Mihngi bad ki paid riewlum, ka NPP kan dei kaba nyngkong ban ieng ha kaban iakhun ia ka hok jong u paidbah.
“Ngin iatrei bad ka NDA, ngi don ia ka kynhun synrop hynrei haba ngi donkam ban iakhun ia ka daw jong ka thain Shatei Lam Mihngi, lane Arunachal Pradesh lane Meghalaya, ngi ieng beit na ka bynta ki briew lajong. Nga kular ia phi ban gin ieng beit bad iakhun ia ka hok ki briew lajong” ula ong.
“Ka NPP ka ngeit ha ka bha ka miat u paidbah bad ha man ki rai ba ngi shim, ngi ju buh hakhmat eh ia ki paidbah bad ia ka ri” ula ong haba bynrap “Ki paidbah kila ai ka rai ha ngi bad ngim lah ban pynkhein ia ka jingshaniah jong ki briew jong ngi. Ngi hap ban trei da ka jingieid bad ka jingaiti lut ban nang pynjanai ia ka bha ka miat ki briew jong ngi”.
Haba kren halor ka roi ka par bad ka ioh ka kot jong ka Arunachal Pradesh, u Conrad ula ong “Ngi donkam ia ki briew kiba tbit ha ka kynhun jong ngi kiba don ruh ia ka jingshemphang bad ka jingiohi jngai. Nga phla sha phi ba ka NPP ka don ia ki Ophisar bala shongthait bad ki Nongtrei Sorkar kiba la wan pyniasoh bad ngi ban iatrei kum ka kynhun ha kaban pyntyllun shakhmat ia ka roi ka par jong kane ka thain jong ngi”.
Haba pan jingkyrshan u paidbah ia ki 22 ngut ki kyrtong kiba iakhun ia ka elekshon Assembly ha Arunachal, u Conrad ula ong “Ngi donkam ia ki kyrtong kiba biang ban pynsngew bad kren ia ki jingsngewkhia jong ngi bad ka NPP kala da jied bha ia ki kyrtong kiba lah shisha ban pynsngew ia ka sur ki paidbah ka Arunachal Pradesh”.
Haba kren halor ka buit ka roi ka par ka Meghalaya, ula ong “Ha ka jylla jong nga, ngi la wanrah ia ki prokram na ka bynta ki nongrep, ki kynthei bad ki samla. Ngi la pynbeit ryntih ia ki prokram kiba lah ban kyntiew beit beit ne da kiwei ki lynti ia ka ioh ka kot bad ka rukom im ki briew jong ngi. Ka prokram sengkam sengjam jong ngi kala ioh khusnam naka Sorkar India bad ki International Agency halor ka Start-Up ba biang tam. Ngi ngeit ba ki kyrtong jong ngi, ynda kila shah jied, kin shim nuksa ia ki buit jong ngi ban pyntreikam ha Arunachal Pradesh”.
 ha ka 19 tarik Iaiong ha ryngkat ka elekshon Lok Sabha.){kind=link}