Itanagar, Jylliew 02 :Ka Arunachal Pradesh bad ka Sikkim, ki artylli na ki saw tylli ki Jylla (ka Andhra Pradesh bad Odisha ki artylli kiwei pat) kiba la pynlong lang ha kajuh ka por ia ka elekshon MLA bad Lok Sabha, kila jied biang ia ki Sorkar rim ba kin shimti ia u lakam ka jingsynshar.
Ka jingniew vote ha kine ki artylli ki Jylla kala long hynne ka sngi U Blei, arsngi shuwa ka jingniew ia ki vote jong ka Lok Sabha.
Arunachal Pradesh
Ha Arunachal Pradesh, kaba iathep vote ha ka 19 tarik ia ka elekshon MLA bad Lok Sabha, ka Bharatiya Janata Party (BJP) kala jop haduh 46 seat na ka 60 tylli, kaba kiew haduh 5 seat na ka elekshon 2019.
Haduh 10 ngut ki kyrtong ka BJP kynthup u Myntri Rangbah ka Jylla Pema Khandu bad u Symbud Myntri Rangbah Cm Chawma Mein, kila jop ia ka elekshon naduh u bnai Lber namar ka jingbym don ki nongialeh pyrshah.
Ka National People’s Party (NPP) kaba iatreilang ha ka Sorkar NDA ba ialam da ka BJP, kala jop 5 seat ha kane ka elekshon, bud ka NCP kaba jop 3 set, ki kyrtong shimet-3, PPA-2 bad ka Congress tang 1.
Haba ai khublei ia ka Party, u Myntri Rangbah Duh ka Ri Narendra Modi uba iakhun ban jop biang ha ka sien kaba lai ban shong ha ka shuki kaba halor eh ka Ri, ula thoh ha ka X : “Khublei ia phi Arunachal Pradesh. Ki briew jong kane ka Jylla ba itynnad kila ai ia ka rai bym lah thew sha ka sain hima sima ki kam pynroi. Ka jingsngewnguh jong nga sha ki ba ki ai ka jingshakri ha ka BJP Arunachal sa shisien. Ka party jong ngi kan nang trei shitrhem shuh shuh na ka bynta ka jingkiew shakhmat ka Jylla”.
Sikkim
Ka Sikkim Karantikari Morcha (SKM), kaba la shu jop da ka said ha u snem 2019 da 17 seat na ka Iing ba 32 ngut ki MLA, mynta kala jop kput bha da ka jingioh khur ia ka jingjop haduh 31 seat bad ai kawei sha ka Sikkim Democratic Front (SDF).
Ka SDF kaba ioh haduh 14 seat ha u snem 2019 mynta kala thih tang shi seat.
“Nga khublei ia baroh kiba la vote ia ka @BJP4Sikkim ha ka elekshon Assembly. Nga ai khublei ia ka jingtrei shitom jong ki Karyakarya. Ka party jong ngi kan don beit hakhmat ha kban trei na ka bynta ka roi ka par ka Sikkim bad ban pynurlong ia ka jingangnud u paidbah” ong u PM Modi ha ka X.
Ka Sikkim ruh kala pynlong ia ka elekshon MLA bad Lok Sabha ha ka 19 tarik Iaiong.
