Shillong , Naiwieng 18: Ka jylla Meghalaya kan kiew ha ka roi ka par tang da synshar hi ka Bharatiya Janata Party (BJP) bad kane kadei ka jingsakhi kumba iohi ha kiwei ki jylla ka ri India khamtam hapoh ka thain Lam Mihngi (North East).
Ia kane la ong da u bah Mariahom Kharkrang uwei na ki ba pan tiket na ka sengsain pyrthei BJP ban ia khun ia ka ilekshon MLA ha u snem 2023 na ka North Shillong konstitwensi.
Haba kren sha ki lad pathai khubor u bah Kharkhrang u la iathuh ba hashuwa ba un iasoh ialade bad ka BJP, u la dep ban khein bha iaka jinglong jingman kiwei ki sengsain pyrthei hapoh ka jylla Meghalaya bad ka ri India baroh kawei.
U bah Kharkhrang u la ong ba haba peit iaka jinglong jingman hapoh ka North Shillong konstiwtensi, kane ka thain ka don saw tylli ki jingduna kaba kynthup ka pule puthi, ka koit ka khiah, ka jingshong shngian bad ka lad ioh kam ioh jam ki samla.
“Ka jingpyn iasoh jong nga bad ka party BJP kadei namar nga la iohi jngai ba lada ka BJP kan wan ha ka bor, ka jylla Meghalaya ruh kan sa kiew kum ba long lem ha kiwei ki jylla ka ri India khamtam hapoh ka thain Lam Mihngi (North East) la ong u bah Kharkhrang.
U bah Kharkhrang u la ong ba ka thong jong u ban iakhun iaka ilekshon 2023 kadei hi ban kyntiew iaki lad ioh kam ioh jam jong ki samla namar haba peit iaka thain North Shillong konstitwensi ki samla ka thain watla kidei kiba la nang la stad hynrei ka jingioh kam ka long kaba duna bha.
U la ong ba wat ki samla kiba la pyndep iaka jingpule haka kyrdan Engineering ruh ki hap ban trei iaka kam ba siew tulop tang T. 5 haduh T. 6 hajar bad kane lada nujor kam dei satia ka kam ba ki trei hynrei kadei ka jingshah khniot bein jong ki samla ka thain bad ka jylla baroh kawei.
“Naduh 3 tarik u bnai Nailur 2022 ha ka sngi ba nga rung BJP nga la kren shai ba ka jingrung jong nga shaka sain hima kadei ban kyntiew iaka thain North Shillong bad ka jylla baroh kawei bad ka jingiasoh bad ka BJP kan iarap shuh shuh ban pynurlong ia kine ki jingangnud jong nga” la ong u bah Kharkhrang.
