Shillong, Naiwieng 12 : Ka Ampati Constituency kan iohi mynta ia ka jingiakhun ba itynnad hapdeng ka Khun jong u MLA barim uba shah pynliem ha u Dr Mukul Sanga, kaban ban aireng kylla ia ka Khun une u Myntri Rangbah barim ha ka elekshon MLA 2023.
Kane ka kyrtong ka dei ka Uttora Sangma khun jong u MLA barim ka Ampati u Monendra Agitok, ka ba la pynieng da ka Congress ban iakhun pyrshah ia ka Khun u Dr Mukul ka Miani D Shira ha kane ka elekshon ban wan.
Ka Uttora kaba trei ha ka Tnad Education kum ka Block Mission Coordinator ha Gambegre, kala shim ia ka Voluntary Retirement Scheme (VRS) ban pyniasoh bad ka Congress bad ban mih aireng pyrshah ia ka Khun jong u Nongialeh pyrshah ia u Kpa ha kane ka Constituency ba u mihkhmat mynshuwa hashuwa ka jingwan u Dr Mukul Sangma.
Ka dei laiphew saw snem mynshuwa haba u Kpa jongka Uttora Sangma (Monendro Agitok) ula shah pynliem noh ha u Dr Mukul Sangma uba la pynmih pyrthei da u Purno A Sangma ban pynliem ia une u MLA.
U Monendro Agitok ula pynkhynniuh ia ka Congress ha Ri-lum Garo haba ula knieh ia ka jingjop ha Ampati kum u kyrtong shimet ha ka elekshon MLA 1988.
Kane kala pynkyndit ia ka Congress khamtam u Purno A Sangma uba dei u Myntri Rangbah ka Jylla ha katei ka por, haba ka Congress kala duh noh ia ka Ampati sha u kyrtong shimet.
U Purno u bym klet satia ia kane ka jingshah pynjah burom, hadien san snem ula pynmih ia u Dr Mukul Sangma ban ioh ia ka kput bad une u Doktor uba dang khynnah ka rta, ula lah ban pynliem ia une u kyrtong shimet.
Hadien kane, u Dr Mukul Sangma ula jop ia kawei ka elekshon hadien kawei pat na Ampati kaba la neh haduh 25 snem tad haduh ba ula aiti ia ka kam long Nongmihkhmat jongkane ka Constituency sha ka Khun ka Miani D Shira, kaba la jop ia ka elekshon shiteng samoi ha u snem 2018.
U Monendro Agitok ula pyrshang ban wanphai biang kum u MLA da ka jingiakhun haduh artylli ki elekshon hynrei ym shym lah thoh shuh satia ia u.
Mynta ka Uttora Sangma kaba la pynkhreh bha ia ka jingiakhun bad ka Khun u Dr Mukul ban ioh bat biang ia ka jinglong MLA ha kane ka Constituency ba mihkhmat da u Kpa laiphew snem mynshuwa.
Ia mynta hi ym lah ban tip kumno ka jingiakhun kan long hynrei la ikop ba kan long kaba itynnad bha.
