Tura, Rymphang 04 : U Myntri Rangbah ka Jylla bad National President ka National People’s Party (NPP) Conrad K Sangma, hynne ka sngi saitjain ula thep kyrteng kum u kyrtong sha ka elekshon MLA 2023 bad pynpaw ruh ba ka NPP ha kane ka kynti kan ioh ia ka jingjop ba palat ia shiteng ka jingdon ki MLA ha Jylla (absolute majority).
U Conrad ula thep kyrteng hakhmat u Returning Officer ka 51-South Tura bad Addl Deputy Commissioner Saljong R Marak ha Tur,a bad la synran ia u da ki bahaiing hasem, ki nongialam bad ki nongkyrshan ka NPP.
Took the blessings of my late father, Sh. P A Sangma before filing for nomination as candidate to represent 51-South Tura Constituency today. Trust the people’s support to the NPP’s mission for Meghalaya.
Long Live NPP! pic.twitter.com/jluZb0cPtP
— Conrad K Sangma (@SangmaConrad) February 4, 2023
Shuwa kane ka jingthep kyrteng, une u Khliehduh ka NPP bala synran da I kurim, kila leit sha u Lum jingtep jong u kpa bala khlad noh bad Myntri Rangbah barim ka Jylla PA Sangma ha Tura, ban pan ia ka jingkyrkhu.
Haba kren sha ki nongthoh khubor hadien ba thep kyrteng, u Conrad ula ong ba ka lyer kala beh bha sha ka NPP bad ki Liang Pyrshah kila nang troin na ka sngi sha ka sngi.
“Namar kata, na kane ka jinglong jingman ha ka sain pyrthei, nga iohi ba ka NPP kan kynjoh ban ioh ia ka jingjop ba mar shiteng na ka jingdon ki MLA ha Jylla bad ngi sngewskhem ba ngin kot ia kane” ula ong.
Halor ki ishu kaba ka party kan ieng ban iakhun ia ka elekshon, ula jubab “Ngin nang pyntyllun shakhmat ia ki kam pynroi ba ngi la leh ha kine ki san snem bad baroh ki kam kila leh ha ki tnad bapher bapher…bad namar ngi la buh ia ki mawnongrim, kala dep ka por ban pyntyllun shakhmat sha kawei pat ka kyrdan..bad ka jinghap bteng ka long kaba kongsan ban pynthikna ba ngin lah ban kynjoh ia kine ki thong”.
U Conrad ula iakhun ban jop biang na South Tura, kaba ula jop hadien ka jingshah jied kum u Myntri Rangbah ka Jylla ha ka elekshon shiteng samoi kaba long ha u bnai Nailar 2018. Ula ioh haduh 13,656 vote bad pynliem ia u kyrtong ka Congress Charlottee M Momin uba wan ba-ar da 8400 vote.
Shuwa kane, ula long u Member of Parliament (MP) ka Tura (2016-2018). Hadien ka jingkhlad noh u Kpa (L) PA Sangma, ha ka 4 tarik Lber 2016, uba dei ruh u MP ka Tura ha katei ka por, u Conrad ula iakhun ia ka elekshon shiteng samoi na Tura sha ka Iingdorbar Lok Sabha ha u Jymmang 2016 bad ula jop kput da 1.92 lak vote.
U Conrad ula bam smai kum u Myntri Rangbah ka Jylla ha ka 6 tarik Lber, 2018.
Kum ban shu kdew, ka sngi khatduh ban thep kyrteng sha ka elekshon MLA 2023 kan long ha ka 7 tarik u Rymphang. Ka jingbishar kyrteng kan long ha ka 8 tarik Rymphang bad ka sngi ba khatduh ban weng kyrteng ka dei 10 tarik Rymphang 2023. Ka jingthep vote kan long la 27 tarik bad ka jingpynbna ia ka result kan long ha ka 2 tarik Lber, 2023.
