Nongpoh, Rymphang 03: Baroh 5 ngut ki kyrtong jong ka National People’s Party (NPP) na Ri-Bhoi District, kila pyndep ia ka jingthep kyrteng hynne ka sngi thohdieng, ban mih aireng ha ka elekshon MLA-2023 ban long ha ka 27 tarik Rymphang.
Kine ki kyrtong ki dei u MLA ka Jirang Bah Sosthenes Sohtun (Jirang), MLA barim ka Umsning Bah Jason S Mawlong (Umsning), MDC ka Umsning Kong Macdalyne S Mawlong (Nongpoh), Bah Damanbaitbha Lamare (Umroi) bad u Bah Shemphang Lyngdoh (Mawhati).
Ia kine ki kyrtong la synran sha ka Ophis u Returning Officer, Nongpoh da ki bahaiing hasem, ki paralok parajor bad ki Nongkyrshan bad nongkitkam jong ka Party.
Haba kren bad ki Nongthoh Khubor, baroh 5 ngut ki kyrtong ki la pynpaw ia la ki nongrim ba kin mih aireng ha kane ka elekshon sha ka Iingdorbar Thawain mynta u snem da ka mynsiem kaba skhem ban ai ka jingshakri kaba janai tam na ka bynta ki paidbah bad ruh ban kyntiew ia la ki constituency lada ki ioh kheit biang ia ka jingjop ha kane ka eleksion.
Ki la pynpaw ruh, ba dei ka party NPP ka National Party kaba la treiborbah bha ha kine ki san snem kiba la leit noh kum ka khlieh duh ban ialam ia ka sorkar jylla, ha kaba la sakhi ia shibun ki jingkylla ha ka liang ka roi ka par, ban kyntiew ia ki nongrep, ki khun samla bad kiwei kiwei kiba la kyntiew ruh wat ia ka jylla hi baroh kawei.
Shuh shuh ruh, ki la pynpaw, ba kum ki kyrtong jong ka party kaba khlain bad kaba don shisha ia ka thong ban shakri ia u paidbah lyngba ki kam pynroi, ki la khot la wer ia u paidbah nongshong shnong jong kine ki san tylli ki constituency ba kin mih shakhmat ban ai jingkyrshan kaba radbah ban pynjop don burom ia ki kyrtong ka NPP khnang ba kum ki nongmihkhmat kin nang lah ban trei na ka bynta ka constituency bad ki paidbah hi baroh
