Nongpoh, Rymphang 03: Lai ngut ki kyrtong kila thep kyrteng hynne ka sngi thohdieng ha Ri-Bhoi, kum ki kyrtong ban iakhun ia ka elekshon MLA-2023 ka ban long ha ka 27 tarik u Rymphang.
Arngut ki kyrtong ki dei kiba iakhun na Umsning ba kynthup ia u Bah Donlang Dohkhlet naka PDF bad u Bah Prison Makdoh na ka HSPDP, ki ban iakhun na Umsning Constituency pyrshah ia u MLA barim Bah Jason S Mawlong na ka NPP bad u MLA barim Dr Celestine Lyngdoh na ka Congress.
Uwei pat u dei u kyrtong ka Congress ban iakhun na Jirang bad une u dei u Bah Edrian C Mylliem u ban iakhun pyrshah ia u MLA ka NPP Bah Sosthenes Sohtun.
Haba iakren bad ki nongthoh khubor, u Bah Donlang Dohkhlet ula ong “Ka Umsning Konstituensi ka la shah iehnoh bein shisha ha la u nongmihkhmat u ba ki paidbah ki la pynjop don burom ia u ha u snem 2018 bad ia kane la sakhi ruh lyngba ka jingbym shimkhia da u MLA ban pynbit pynbiang ia ki lad pynroi bapher bapher bapher”.
Ula ong ba ka Umsning ka dei ban kyndit bynriew noh bad ban jied ia u nongmihkhmat u ban trei bha na ka bynta u paidbah ka dong ka thain
U kyrtong ka HSPDP pat ula pynpaw ba ka nongrim ka jong u ban mih aireng ha kane ka ileksion MLA ka dei namar ba u la sakhi ia ka jingdonkam jong kane ka Konstituensi ia u nongmihkhmat u ba dei hi u trai shnong trai thaw hapoh ka Konstituensi, namar tang u trai iing hi u sngewthuh ia ki jingeh bad ki jingdonkam jong ki paidbah bad ka Konstituensi hi baroh kawei.
Na ka liang u Bah Edrian C Mylliem ula pynpaw ba u don ka thong ban ai ka jingshakri kaba janai ia ki paidbah khamtam ki khun samla, ki paid nongrep bad ruh ban kyntiew ia ka roi ka par hapoh ka Jirang constituency kaba dang dei ka constituency kaba dang sahdien shaba palat khamtam ka dei kaba jan bad sor bah Guwahati.
Nalor kane ula ong ruh ba u don ka jingangnud ban lah ban pynbeit ruh ia u pud u sam ba tikna hapdeng ka Assam bad Meghalaya kyrpang eh ia u pud u sam hapoh ka Jirang Konstituensi.
