Shillong, Naiwieng 18: U President ka BJP Meghalaya u Bah Ernest Mawrie hynne ka sngi thohdieng ula pynpaw iaka jingskhem jingmut ba ka seng kan jop iaka elekshon MLA 2023 na ka North Shillong Constituency.
Haba plie iaka ophis treikam jong ka BJP North Shillong mandal ha Jail Road, u Bah Mawrie ula ong, ba ka seng kala rem tang khyndiat vote haka elekshon MLA 2018.
“Mynta ka kynti ngin pynthikna ba ngin jop ia ka elekshon ban wan na katei ka constituency” ong u Bah Mawrie.
Ha kane ka constituency ki don ar ngut kiba la pan tiket naka BJP kiba kynthup ia u Bah M Kharkrang uba long u heh ophisar pulit barim ka jylla bad ha kajuh ka por u Nongaiktien ka BJP bad u dkhot ka BJP u Bah Michael Kharsyntiew.
“Nga kyntu ia baroh ba kin iatreilang. Ngim lah ban pynsangeh iano iano ruh hynrei baroh ki kam ki jam jong ka seng la dep ban pyndep lut hapoh ka jingialam jong u mandal president. Ia kane ka mandal committee kaba pura la dep ban ai jingithuh da ka jylla bad kaba sah mynta kan shong ha ki nongialam kiba don halor eh. Ka Central Parliamentary Committee kaba khlieh da u Myntri Rangbahduh ka ri u Narendra Modi kan sa ai tiket ha u briew uba biang tam eh” ong u Bah Mawrie bad ka bynrap, “To ngin ia ap shwa bad ngin shitom lang. Nga tip ba ki kyrtong ki jong ngi ki trei man la ka sngi ban pynbna noh iaka kyrteng jong u kyrtong na ki nongialam kiba ha khliehduh bad nga kyrmen skhem ba ki nongialam kin ai tiket ha u kyrtong uba don bha iaka lad ban jop iaka elekshon”.
Katba u Bah Kharkrang ula ong, lyngba ka jingai jingkyrshan ki paidbah u ngeit skhem ba 100 na ka 100 ka BJP kan jop na ka North Shillong haka elekshon ban wan.
Ula pynpaw ba ka long kaba donkam ban iatreilang hapdeng ki ki riewlum bad ki bym dei riewlum bad ula ong, ha ka por ba plie iaka ophis treikam jong ka seng ha
Riatsamthiah, ki briew na Jail Road, Oakland bad ki bym dei riewlum kila wan ban ai jingkyrshan, kumta ki briew kiba sah ha ki jaka Khasi mynta kila wan ban ai jingkyrshan ha ka jingplie iaka ophis ka seng ha Jail Road.
“Nga ong ha phi ba kane ka (Constituency) kan jop da ka BJP bad nga ong ruh ba ngin sa pynduh noh iaka jingiapher hapdeng ki bym dei riewlum bad ki riewlum. Kane kadei kaei kaei kaba ngi hap ban ialeh, lada ngi kwah ban kyntiew ngi donkam ban kyntiew mar kylliang bad ngin ym lah ban kyntiew hi dalade” ong u Bah Kharkrang.
U Bah Kharkrang ula kular ruh ba kane ka Building kan iai long ka Ophis ba shirta jong ka BJP bad kan iai neh wat hadien jong u snem 2023.
“Ngin don s alai bnai ka por ban treikam. Sngewbha ngim dei ban khein sting. Nga thikna ba ka jingtrei shitom jong phi kan sa iohi ia u doh ha u bnai Rymphang” ong u Bah Kharkrang.
