Shillong, Rymphang 3:Ka Mawlai Nonglum Durbar, ka la rai ban pynlong da ka Common Platform ha ka 18 tarik mynta u bnai ia baroh ki kyrtong ki ban ia aireng ha kane ka jingjied ia U/Ka Nongmihkhmat na ka 15-Mawlai (ST) Legislative Assembly Constituency sha ka iingdorbar thawain ka jylla.
Ka Durbar ha u kyrwoh lyngba u Bah SD Khongwir, Rangbah Shnong ka pyntip ba ha katei ka Common Platform yn ailad ia ki kyrtong ba kin ioh ban pynshai paidbah sha ki nongshong shnong jong ka shnong ia ka nongrim jong ki.
Yn pynlong ia kane ka Common Platform ha katei ka tarik ba la kdew ha ka por 10 baje mynstep ha Madan Basketball jong ka shnong kaba don ha Mawlai Nonglum Block – 5 (Pdengshnong). Ha katei ka jingpynshai paidbah yn shah / ailad tang uwei , kata u kyrtong ban shim bynta bad ka por kren / pynshai kan long 30 minit.
Ia ki kyndon jong ka Shnong ha ryngkat bad ki kyndon ba la buh da ka State Election Commission yn sa batai bniah da u Lamphang u ban pyniaid ia katei ka jingialang.
Kumta ruh la kyntu ban pdiang bad burom ia kane ka jingpynbeit jong ka shnong ban poi sha katei ka sngi bad ka por ba la buh.
Ha kajuh ka por ka Mawlai Nonglum Durbar ka pyntip ruh ba ka shnong kan ym shah ia kano kano ka public meeting jong ki kyrtong hapoh shnong lait na kane ka Common Platform ba la pynbeit.
Ia ki lama lane shap jong u kyrtong yn shah ban buh tang kawei ha ka jaka ban shong u kyrtong. Yn ym shah ia ki paidbah ba kin rah ne sei ia ki lama jongno jongno ruh.
Ia ka PA system bad kiwei ki jingdonkam yn pynkhreh da ka shnong bad ia ka jinglut jingsep yn hap bei lang da baroh ki kyrtong.
