Shillong, Naiwieng 22: U nongialam ka BJP uba long ruh u MLA barim ka South Tura u John Leslee K Sangma hynnin ka sngi ula pynbna ba yn aireng iaka elekshon MLA 2023 na South Tura Constituency.
“Nga la shim iaka rai ban wanphai biang sha ka kam sain pyrthei hadien ba bun ki nongkyrshan, ki seng saiñ pyrthei kila wan ban kyrpad ia nga bad nga la rai ban pyniasoh bad ka BJP ha ka 29 tarik u Jylliew” la pynpaw u John lyngba ka kyrwoh khubor.
Ula ong halor ka jingkyrpad jong ki paidbah ka South Tura, ula lum iaka jingialang haka iingsah ka jong u haka 20 tarik u Naiwieng.
“Da ki spah ngut kila wan ban pyni ba ki ai jingkyrshan ia nga ban iakhun iaka elekshon bad nga la pynthikna ia ki nongkyrshan ki jong nga ba lada nga iakhun iaka elekshon, ngan iakhun tang na South Tura hi. Ka jingialang kala pynshai kdar iaka jingsngewthuh bakla kaba la saphriang ha kylleng bad ngan pynkhreh ryngkatbad ki nongkyrshan ban iakhun iaka elekshon kaba la jan artad” la pynpaw u John.
Ula ong kila don ki riew khwan myntoi shimet kiba la pynklumar khlieh ia ki paidbah da kaba pynsaphriang iaka hamsaia bay n iakhun iaka elekshon na North Tura tangba kane kam long kaba shisha.
U la pynpaw ba ula pyniasoh bad ka BJP ban pynurlong iaka jingangnud ban wanrah iaki kam pynroi na ka bynta ki paidbah, ban iaid haka lynti ban aikam aijam ia ki samla bad kaba kham halor eh ka long ban iada iaka bha ka miat jong ki trai ri trai muluk bad ban iada iaka bha ka miat jongki nongshong shnong ki bym dei ki riewlum kiba shong basah hapoh ka jylla.
“Nga lah don ka jingiadei bad iatreilang bad ki paidbah jongka South Tura bad ki don da ki hajar ngut ki paidbah kiba phaikhmat sha nga bad ki shaniah ha nga, haba ki don ia kino kino ki jingeh bad ngam lah ban kyntait iaki tang na ka bynta ka jingmyntoi shimet ka jong nga ne tang namar ka kam sain pyrthei. Kaei kaba nga don na ka bynta ki paidbah ka South Tura kadei ka dohnud ka jong nga, kadei ka iap ka im na ka bynta ka jong nga ha South Tura,” ong u John.
