Shillong, K’lyngkot 16 : Ka Voice of the People Party (VPP), kaba dei ka seng sain pyrthei ba dang shu pynkha shen, hynne ka sngi nyngkong, kala pyllait paidbah ia ka thup kyrteng jong baroh ki kyrtong ki ban mih iakhun ha kane ka elekshon MLA-2023 ha Jylla.
Ka VPP kala rai ban pynieng tang 16 ngut ki kyrtong ha kane ka elekshon ban wan bad ia ki kyrteng jong kine ki kyrtong la pynbna paidbah da u Dr Kara Chen ha ka jingialang paidbah kaba long la madan Polo, Shillong.
U President ka Party Bah Ardent M Basaiawmoit, MLA barim ka Nongkrem, u dei uwei na ki kyrtong ban mih iakhun ha kane ka elekshon na Nongkrem pyrshah ia u MLA ba pynliem ia u ha u 2018, Bah Lambor Malngiang.
Kiwei pat ki kyrtong ki long u MLA ba dang shu iehkam shen na North Shillong Bah Adelbert Nongrum, Damewanhi Rymbai (Khliehriat), Dr Ricky AJ Syngkon (Umsning), Heavingstone Kharpran ( Mawryngkneng), Brightstarwell Marbaniang (Mawlai), Avner Pariat (East Shillong), Raja Jyrwa (West Shillong), Danny Langstieh (South Shillong), Aibandaplin F. Lyngdoh (Mylliem), Winston Tony Lyngdoh (Nongthymmai), Doristar Marbaniang (Mawphlang), Manbhalang Thabah (Pynursla), Shanlang Warjri (Mairang), Mayborn Lynhdoh (Pynthorumkhrah) bad Overlin Imiong (Ranikor).
U President ka Party Bah Ardent M Basaiawmoit bad kiwei kiwei ki Nongialam, haba ai jingkren ha ka jingialang bala wan iashimbynta da ki spah ngut ki nongkyrshan, kila ai jingpynshai halor ki nongrim jong ka party bad ki kam ba ka party kan leh na ka bynta ka Jylla.
Lah ban kdew hangne ba ia ka VPP la pynkha ha u bnai Naiwieng 2022 bad jan baroh ki kyrtong ki ban mih aireng ha kane ka elekshon ban wan, ki dei kiba dang mih iakhun ha ka sien ba nyngkong eh.
