Shillong, K’lyngkot 25 : Ka National People’s Party (NPP) kala kynthoh ba ki paid Nongrep bad ki Nongshongshnong ka Jylla Meghalaya kin sa ai jingsneng ia ka All India Trinamool Congress (AITC) ha kane ka elekshon MLA-2023 namar ki jingkular ba shu thok bad ba thylli.
“Ka shong satang ka por, ba ka TMC kan sa ioh ia ka jingsneng na ki nongrep bad ki nongshongshnong ka Meghalaya, namar ki kam thok bad ka buit ban shukor ia ka Jylla Meghalaya, tang ban kynjoh ia ka thong ha ka elekshon” ong ka NPP ha ka kyrwoh.
Kane ka jingkynthoh kala mih tang hadien shisngi ba ka AITC kala pyllait paidbah ia ki mat ialap elekshon (manifesto) ha Jylla bad ki 10 tylli ki jingkular ia ki paid nongshongshnong ka Jylla lada kane ka Party ka wan ha ka bor synshar.
Ka NPP kala niew ia ka ‘Farm Promises’ ne ka jingkular ia ki paid Nongrep ha ka Manifesto ka AITC kum ka jingkular kaba thylli bad kaba shu thok haba kdew “Ki Nongialam ka AITC ha ka por ba ki synshar ia ka Jylla hapdeng u 2010-2018, kim shym la sngewthuh ia ka jingeh jong ki nongrep bad leh kiar ruh ia ki”.
“Hynrei ka Sorkar ba ialam da ka NPP hapdeng u 2018-2023 kala wanrah ia ka skhim ba heh bha jong ki nongrep-ka FOCUS bad FOCUS+. Ka AITC kala kem tieng bad haba kam ioh lynti satia ban kner ia ki kti sha ki Nongrep, kala shu kular da ka song pisa, ia kiba ka Sorkar NPP kala dep pyntreikam bad la buh ban pyntrei ia ka skhim sa ha kine ki 10 snem ban wan” kala ong.
Haba ban biang ba ka jingiarap song pisa bala kular da ka AITC kam dei kaei kaei ruh hynrei ka dei ka ‘Baaki Card’ (card shim ram), ka NPP kala ong “Kiba bun ki paidbah ka Jylla kila dep kyntait ia kane ka jingpynrung kyrteng ba shu thok bad kila khein ia kane ka prokram jong ki kum ka jingkular thok. Kila pyniaid iew jubor ia ka campaign (jingialap) ha ki rynsan pathai khubor ba kila don bun bah ki nongpynrung kyrteng,hynrei ka jingshisha ka long ba ka dei tang ka buit pynbiej briew bala pyndonkam da kane ka party”.
“Katba, ka NPP hapoh ka jingialam u National President Conrad K Sangma, kala pyllait paidbah ia ki prokram ba seisoh FOCUS bad FOCUS+, kaba la ai jingmyntoi haduh 3.1 lak ngut ki nongrep” kala bynrap.
Ka NPP ka ong “Ngi sngew ba ka AITC bad ki Nongialam kila iohthiah lyngngai ha ka por jong ki bad kila pyrshang ban pyrthuh ia kawei kaba ka NPP kala dep sdang. Ka AITC ka dei ban phaihmat ia ki mat jong ka Jylla (local issue) ha ka jaka ban pyrkhat palat ia kaei kaba kila leh ha Bengal bad ban wanrah ia kajuh ha Meghalaya”.
Halor ka jingkular ka AITC ban wanrah ia ki “Farm Centre” ha baroh ki District ka Jylla, ka NPP ka ong “Ki Farm Centre kila treikam mynta ha Jylla lyngba ka jingtrei ba khlem shongthait jong ka Sorkar ba ialam da ka NPP. Ha kine ki san snem, la pynkha haduh 330 tylli ki Integrated Village Cooperative Society, la tei haduh 300 tylli ki Collective Marketing Centre bad 50 tylli ki Farmers Market ha baroh kawei ka Jylla ban ai ia ka iew ka hat ia ki nongrep. Haduh mynta, palat, 1 lak tylli ki longiing kila ioh jingmyntoi lyngba kine ki prokram bala wanrah da ka Sorkar MDA ba ialam da ka NPP”.
Haba kynthoh ba kane ka “Farm Promise” jong ka TMC ka dei kabym thikna bad kaba pynartatien, ka NPP ka ong “Kim don satia wat ia ka samari halor ka jingdon ki nongrep ki ban ioh jingmyntoi lane ki prokram kiba kumno ba kan shim. Kine ki dei ki jingkular ba thylli bad kaba shu pynbiej paidbah”.
Ka NPP ka ong ba hapdeng u snem 2010-2018, kala don ka jingkhuslai kaba jur hapdeng ki nongrep ka Jylla namar ka jingbym ioh ia ka jingkyrshan bad jingiarap na ka Sorkar. Ka ong ba ki Nongrep kila duh ia ki subsidy bad ki sboh dawai ha ka nam ban kyntiew ia ka kamrep ba khlem khleh dawai, kaba lam sha ka jingktah kaba jur ia ka kamai kajih ki nongrep.
“Haba shimkhia ia kine ki jingeh ki nongrep, ka Sorkar MDA ba ialam ka NPP kala wanrah ia ki skhim bapher bapher nalor ka FOCUS bad FOCUS+ bad ki jingtei ia ki Iew ki Hat. Kala thied ruh ia ki mar rep kiba shongdor kum u shynrai, vanilla, cocoa (coffee), sying lyngba ki Cooperative bala pynkha” ong ka NPP haba bynrap “Ia ka Organic Agriculture Policy ruh lah dep ban mynjur, ka ban treikam ha palat 15000 hectare ka jaka rep bad kaban kynthup ia 15000 ngut ki nongrep bad kumba 28 tylli ki FPC”
Haba batai ia ki prokram bala wanrah da ka Sorkar MDA, ka NPP kala ong “Ka Sorkar kala wanrah ruh ia bun jait ki Mission Mode Project kum ka Lakadong, Ginger, Honey, Spices, Mushroom Mission, Milk, Jackfruit bad kiwei kiwei”.
“Ka State Piggery Mission, kaba hehduh ha ka Ri, ka dei kaba la wanrah ha ka jingmang tyngka ba kot T. 209 klur, ban pynlong ia ka Jylla kaba lah ban pyndap nalade ia ka dohsniang. Ia ka Meghalaya Milk Mission ruh la pyntreikam ha ka jingmang pisa ba T, 215 klur. Baroh kine ki prokram kila pynphuh samrkhie ia ki paid nongrep”.
Ka NPP ka ong ba ki jingkular thok ka TMC kin jin da urlong shisha jin ba ki Nongialam na Kolkata, kila shimkhia ia ka jing long jingman ba isangsot jong ki paid nongrep ha Bengal, shuwa ba kin thaw buit ia ka Meghalaya.
Ka NPP ka ong, ka TMC da ka jingthmu ban shukor ia ki nongshongshnong, kam lah ban pynklet ia kipaidbah halor ka kam khaii beain ia ki masi ba da ki klur tyngka ha Bengal, kaba donkti lang da u Nongialam ka TMC ba khlain bor bha u Anubrata Mondal.
