Shillong, Nohprah 03 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi saitjain ula ong ba ka jingkylli kam mih satia ba ka NPP ka shet kylla da kaba pynduh ticket ia la ki jong ki MLA ba mynta.
“Kam don satia ka jingshet kylla. Iaka party hi ngi hap ban khmih ia baroh ki liang bad ruh ia baroh ki kam ba iadei bad ka elekshon ban wan. Ngim dei tang ma ngi na ka party ba leh ia kane lane shim ia kum kane ka rai “ ong u Conrad haba iakren bad ki nongthoh khubor.
Une u Nongialam ka NPP ula pynbna ia u Lamphang barim ka Iingdorbar AT Mondal kum u kyrtong ka NPP na Phulbari Constituency, kaba mihkhmat mynta da u MLA ka NPP u SG Estamur Mominin.
Arngut ki MLA ka NPP ba kynthup ia ka Ferlin CA Sangma ba na Selsella bad Benedic Marak na Raksamgre, kila iehnohkam kum u MLA ka Iingdorbar Thaw Ain hadien ka jingsngewthuh ba kin nym ioh satia ia ka ticket na ka party ha ka elekshon MLA-2023.
Haba pynpaw ba kam dei kaba suk ban shim ia kum kine ki rai, u Conrad ula ong “Ngam ong ba ka dei kaba suk ia ngi ban shu shim rai bad jam shakhmat bad khlem ai ticket ia kino kino ki briew. Ka dei ka kam kaba eh bha hynrei kum u Nongialam ka party, nga don ka jingkitkhlieh ban pynthikna ba ngin pyntynllun shakhmat ia ka party ha ka elekshon ban wan kat kaba ngi lah bad namar kata ngi hap ban shim ia ki rai kiba eh bad ngi la leh ia kane”.
U Conrad ula pynshai ruh “ Kane kam mut ruh ba ngim don eiei shimet pyrshah iano iano ruh. Kumba nga la kren, ki don shibun ki seng sain pyrthei ha ka ri-ki ruh kila pynduh ticket ia kiba bun ki MLA bad kane kala jia ruh. Kam dei kaba suk ia ngi ban shim ia kane ka rai namar ngi hap ban shim ia ka rai ba eh haba buh hakhmat ia ka bha ka miat jong ka Jylla bad ka party”.
Haba kylli ba katno ngut na ki MLA ba mynta kin nym ioh ticket na ka NPP, une u Nongialam ula ong “kane kan shong kat kum ka jinglong jingman”.
Ha kajuh ka por, u Conrad ula pyntip ba ka NPP kan pynthikna ba kan ioh khur ia ka jingjop na kiba bun ki Constituency ha kylleng ki jaka jong ka Jylla.
“Nga la ju kren ha man ba nga ai jingkren ba ka elekshon kam dei ka kam kaba suk ban shu ia batai lypa bad kheinsting, phi hap ban trei shitom bad phi donkam ban don ia ka jingmut jingpyrkhat kaba khlain. Phi hap ban pyrkhat ba ki kam ki dei kiba eh bad hap ban trei shitom watla ki briew ki wan ban pyntip ba kiei kiei baroh ki dei kiba biang lut. Ka khyllipmat ba phi ong ba kiei kiei ki biang lut, nga tharai kane ka dei ka jingsdang jong ki jingbakla baroh” ula ong haba kyntu ia ki nongtrei ka party ban ym kheinsting ia ki nongialeh pyrshah.
