Shillong, Naiwieng 18 : U President ka BJP – Meghalaya Bah Ernest Mawrie hynne ka sngi thohdieng, ula pyntip ba ka BJP kan ai ticket tang sha ki kyrtong ki ban jop ha ka elekshon MLA-2023.
Haba iakren bad ki nongthoh khubor, une u Nongialam ka BJP u pyntip ba kat kum ka jingbthah jong ki Nongialam na Delhi, ka party kan sei kyrtong ban iakhun na baroh 60 tylli ki Constituency ha kane ka elekshon ban wan.
Ula pyntip ruh ba ka jingthaw ia ki Mandal Committee kala dep ha ki 55 tylli ki Constituency bad ia ki san tylli kiba dang sah, ki dang iaid mynta ban pyndep noh.
Haba pynpaw ba ki don ki Constituency kiba ka Party ka don ar-lai ngut ki briew ba kwah ticket ban long kyrtong, u Bah Ernest ula ong “Hynrei nga ngeit skhem ba ka Party kan ai ticket tang sha ki kyrtong ki ban jop. Haba iaid kat kum ka kaiphod survey, ka Central Parliamentary Committee kan sa shong bad rai ia ka ticket”.
Kat kum ka jingong jong u ki don artylli ki kaiphod survey bad ka kaiphod ba-ar ka dang don ha lynti. “hadien bala dep lum lut ia baroh ki jingtip, ki kyrtong ki ban jop kin sa ioh ia ka ticket na ka party” ula ong.
Une u Nongialam ka BJP ula pynshai ruh ba kam don satia ka jingbym shai haba iadei bad ka jingai ticket na North Shillong Constituency bad ong ba baroh arngut- Bah M Kharkrang uba dei u Heh Pulit IPS bala shongthait bad u Nongaiktien ka Party-Bah Micheal Kharsyntiew ki dei kiba pan ia ka ticket naka party.
“Ngim lah ban pynbna iano iano ruh kum ki kyrtong ka party namar ki dang dei kiba kwah ticket ban long kyrtong. Wat nga kum u President ha Jylla, nga dei u nongpan ticket na West Shillong Constituency” ula ong.
Haba kylli, u Bah Mawrie ula ong ba um lah satia ban kren eiei halor ki symboh jong ka kaiphod survey haba ong “Ngim pat dep shim rai halor ka kaiphod” hynrei ula bynrap “Kiei kiei baroh kin sa long shai ha ka taiew ba nyngkong jong u Nohprah. U Joint Coordinator na Delhi un sa wan bad ngin sa shong jingialang ban iatai halor ka kaiphod bad u National General Secretary (Organisation) BL Santosh un sa wan sha Jylla nalor u National President bad hadien kane kin sa shim ia ka rai halor ka ticket”.
