Nongstoin, Rymphang 14 : Katba ka sngi thep vote ka dang tur shajan, ka Nongstoin Constituency kala sakhi ia ka jingiatan tyllai kaba jur hapdeng 4 ngut ki kyrtong, kiba don hakhmat eh ha ka jingiakhun ban long ki Nongmihkhmat ka Constituency ha kane ka elekshon MLA-2023.
Kine ki saw ngut ki kyrtong ki dei u MLA Bah Macmillan Byrsat (NPP) uba don hakhmat eh, u MDC Bah Gabriel Wahlang (INC), Bah Sanjied Kynsai Shangrit (HSPDP) bad u Bah Polestar Nongsiej (UDP).
Napdeng ki phra ngut ki kyrtong kiba iakhun na kane ka Constituency ka West Khasi Hills, kine ki saw ngut ki dei kiba la pawkhmat eh ban iaknieh ia ka jingjop khamtam u MLA bad u MDC.
Kumba long haduh kane ka khyllipmat hi, ka lyer ka kham noh sha u bah Macmillan Byrsat, MLA na ka party NPP, u ba ki paidbah ka Nongstoiñ hi ki la ïohi bad sakhi khambha ïa ki kam bad ki jingtreikam ba u la leh ha ki san snem kum u MLA jong ka dong ka thaiñ.
U bah Gabriel Wahlang MDC ruh u dei u kyrtong u bym lah ban khein sting bad u lah ban pynkyndit ia ka result jong ka elekshon. Une u MDC ula liem tang da 60 vote ha u Bah Macmillan Byrsat ha ka elekshon MLA 2018 bad jop kput ha ka elekshon MDC 2019.
U Kyrtong ka HSPDP Bah Sanjied Kynsai Shangrit ruh uba dang shu mih thymmai mynta ban iakhun ia ka elekshon, u dei u kyrtong uba la paw ha ka jingiakhun bad katba nang mih ki sngi, une u kyrtong ula nang suhthied ha man ki kyntoit jong ka constituency bad ula lah ban pynpharia ia ki vote.
U Bah Polestar Nongsiej kyrtong ka UDP ula ioh mynsiem na ka jingbeh jong ka lyer ka Party hapoh ka Constituency.
Ki paid nongthep vote ka Nongstoin Constituency kin sa ai ia ka rai jong ki ha ka 27 tarik Rymphang. Ka jingniew ia ki vote kan long ha ka 2 tarik u Lber.
