Shillong, K’lyngkot 28 : Ka Voice of the People Party (VPP) ha ka sngi Ba-ar, kala dawa ia ka Tnad District Council Affairs (DCA) ba kan pynmih ia ki jingbthah ba kyllum ia baroh ki Rangbah Shnong ba kin kiar na kaba shim ia kano kano ka siejam kaban ktah ia ka jingpyniaid ia ka elekshon kaba laitluid bad ka bym iashah liang.
Ha ka shithi sha u Commissioner & Secretary ka Tnad DCA, u General Secretary bad MP ka MPP Dr Ricky AJ Syngkon ula kynnoh ba ka rai jong ki katto katne ki Rangbah Shnong/Sordar Shnong kala pynduh lad ia ka VPP bad ia ki kyrtong jong ka ban pynlong ia ki Jingialang paidbah (public meeting) ban ialap elekshon.
Kane ka jingujor kala mih ruh tang hadien katto katne sngi, hadien ba ka Mawlai Town Dorbar lem bad ki kyrtong, kila mynjur ban nym pynlong ia ka elekshon MDC ban wan kum ka tamasa, ban pynlong ia ki jingialap elekshon tang da ki Common Platform ha baroh ki Shnong ka Mawlai ym shuh da ki jingialang paidbah (public meeting).
Ka Mawlai Town Dorbar kala shim ia kane ka rai ha ka jingiadonlang u kyrtong ka VPP ban aireng na Mawlai bad kiwei kiwei ki kyrtong.
Ia kane ka rai la pynshong nongrim halor ka jingud jingnam jong ki Kmie Kpa, namar ba ki Khun ki Kti jong ki, ki dang don hapdeng ki eksamin bapher bapher jong ka Meghalaya Board of School Education (MBoSE).
“Kumta, nga kwah ban kyrpad ia phi ban sngewbha pynmih ia ka jingbthah ba kyllum ia baroh ki Rangbah Shnong ba kin kiar na kaba shim ia kum kane ka sienjam kaba ktah ia ka jingpynlong ia ka elekshon kaba laitluid bad bym shah liang bad ban pynsuk ia ki seng sain pyrthei bad kyrpang ba kin pynlong ia ki jingialang da kaba ai ia ki NoC hapoh ka por kaba biang hadien ba ki iohpdiang ia ki aplikeshon la ka dei hapdeng ka jingtreikam ka Model Code of Conduct ne kiwei kiwei” ula ong.
Une u MP ula ong ba kila don ki khep ba ki kyrtong ka VPP kila iakynduh ia ka jingeh ban ioh jingbit ha kaban pynlong ia ki jingialang paidbah/ialap elekshon na ka Ophis ki Rangbah Shnong ka Ri-lum Khasi bad Jaintia.
“Ki don ki khep ba kim ai ia ki jingbit bala pan lane ai ynda la dier kaba la ktah ia ka jingialap elekshon jong ngi. La ju mad ruh da ki kyrtong jong ki ba ki don ki Dorbar Shnong kiba khang ban pynlong ia ki jingialang paidbah lait noh tang ki Common Platform ba ki pyniaid ma ki. Kine ki kam jong ki katto katne ki Dorbar Shnong kilaktah bha ia ka hok tynrai bala pruid dak ha ka Riti Synshar ka Ri” ula ong ha ka shithi.
