Elekshon MDC | Thalain ka UDP ia ka VPP ba kynnoh ia ka party kum ka “Nongshim kabu”

Shillong, K’lyngkot 09 : Ka United Democratic Party (UDP) kala thalain kylla ia ka liang pyrshah Voice of the People Party (VPP) namar ka jingkynnoh ia ka party ba ka dei ka “Nongshimkabu”.

“Ban ong ba ngi dei ki nongshim kabu bad kine kitai, ka dei ka bym iahap satia. Phi dei ban sngewthuh kumno ka riti synshar paidbah ka iaid. Phi dei ban sngewthuh kumno ka sain pyrthei ka iaid” ong u General Secretary ka UDP Bah Jemino Mawthoh.

Kane ka jingkynthoh kala mih hadien ba u Nongaiktien ka VPP Bah Batskhem Myrboh dang shen ula kynnoh ba ka UDP ka dei ka nongshim kabu bad kala ak hok watla ka dei kaba donlang bad ka Sorkar hapoh ka Jylla.

U Bah Jemino ula ong ba tang namar ka VPP ka don sha kawei pat ka liang, kam dei ia ka ban shu kawang ktieh ia ka UDP.

“Kaei kaba jia ha kato ka por hadien ka elekshon MLA 2023, mynta ka VPP ka kwah ban thaw Sorkar bad kiwei pat ki seng sain pyrthei, hato ka lah ban long ? Mynta phi ong kumno ia kane? Hato ka lah ban ong?, TMC, Congress, VPP, HSPDP, UDP, NCP- ngi hap ban sngewthuh. Tang namar phi don sha kawei ka liang kam mut ba phi lah ban shu kawang ktieh ia ngi” ula ong.

Haba pynpaw ba ka UDP baroh shikatta kala shim ia ka bynta ban tei, u Bah Jemino ula ong “Ngi ia im ha kajuh jong ka sain hima khleh khaw lang bad haba ki paidbah kila ai ia ka rai, ngi hap ban iaid bad katei ka rai. Ka dei ka jingai jaka kaba hap ban leh haba phai sha ka kam thaw Sorkar bad katba ka dang don ka jingiasngewthuh jingmut hapdeng ki paralok kiba iatreilang, kam ju don satia kata ka jingiashim kabu”.

“Ngi hi ngim ju shim kabu namar haba ngi iohi ba ka Sorkar ka iaid ha ka lynti kaba bakla, ngim ju artatien ban kdew kti ia ka Sorkar bad ym tang katta, wat iala ki jong ki dkhot ka party ruh kumjuh” ula bynrap.

U Bah Jemino ula ong, watla katta ka UDP kala pyrshang ban kiar na ki kami a kawang ktien naba kala ieng ban iakhun da kaba shaniah iala ka jong ka bor.