Shillong, K’lyngkot 09 : U bah Marbiang Nongsiej, uba la pynkhreh bad iaid pynithuh ialade ban mih iakhun ia ka elekshon MDC kum u kyrtong ka Voice of the People’s Party (VPP) na Nongstoin Constituency, ula pynpaw ia ka jingsah ha ka um dum halor ka rai ba syndet syndet jong ka VPP ban knieh noh ia ka ticket tang da ki taiew hadien bala dep pynbna paidbah ia ka kyrteng jong u.
Kat kum ka kyrwoh ba ula phah,u Bah Marbiang ula pyntip ba haduh mynta ym pat tip satia ia ki daw ba ka VPP ka knieh noh ia ka ticket bala pynbna ban ai sha u bad ka State Election Committee (SEC) ka party ruh ka khlem khot ne iakren eiei halor kane ka kam hynrei kala shu weng hi dalade.
“Ka jingkylli ka long ba lada kim ibit ia nga balei ki ai na ba sdang?. Lada kim ai naba sdang ngam lei lei, hynrei nga shim ba kane ka jingleh ia nga ka dei ka jingpynkhein wat ia ka hok longbriew manbriew bad nga pyrkhat ba wat ka mynsiem iatip lem ruh ka lah iap”, ong u Bah Marbiang Nongsiej.
U Bah Marbiang ula pynkynmaw ia ka jingjia halor ka jingpynbna kyrtong ha North Shillong constituency bad ong “U Nong aiktien ka VPP ula kren shai ha ka kyrwoh khubor ba ka party kam lah shuh ban pynkylla ia ki kyrtong bala dep pynbna (ki briew bala ai ticket) namar baroh ki kyrtong ki dei kiba la dep bishar da ka party bad la pynkupbor ruh da ka riti treikam jong ka party ha kaba ka rai jong ka party ka dei kaba halor duh”.
“Kane ka buh ia nga ha ka umdum. Ngam sngewthuh shuh kumno ka VPP ka shim biang ia ka ticket kaba la dep pynbna ban ai sha nga” ula bynrap.
U Bah Marbiang u iathuh ba ula aplai ia ka ticket jong ka VPP naduh u bnai Naiwieng 2023 namar ka party ruh ka dang pyrkhat ba ka elekshon kan long ha u snem 2024. U iathuh ba ha ka elekshon MP, ki nongialam ka VPP na Nongstoin, kila bynshet ha u ia ki kam kiba khia bad ula trei shitom ruh na ka bynta ka party haba ngeit ba u Organising Secretary ka VPP-Nongstoin un kubur ia kane.
U iathuh ba ha ka 11 tarik Naiwieng 2024, ka State Election Committee kala phah wan ia u bad ia ki nongaplai ticket sha ka Ophis ka party kaba don ha Laitkor bad ha kane ka sngi, ka SEC kala pynbna syndon ia ka kyrteng jong u ba un long u kyrtong ka party na Nongstoin Constituency ha ka elekshon MDC.
“Hadien shisngi ba dep pynbna ticket, nga la phone ia u President ka party bad nga da kylli ruh la ka lah long ne em ba ngan leit pynithuh ialade ha ki lok ki jor ki shnong ki thaw ba nga la ioh ticket. U la jubab hooid ka long. Kumta nga la iaid kylleng ka Nongstoin Constituentcy bad ha ka 2 tarik bnai Nohprah 2024 u President Rangbah u la phah wan ia nga na bynta ka Orientation program ha office party” ula pyntip.
Hynrei ula ong “ Kaba pynlyngngoh ia nga ka long ba haduh kane ka sngi ba mynta, ka SEC ka khlem pat khot ia nga ban iakren. Lada don ki daw (ba knieh noh ia ka ticket), kala dei ban khot markhmat ban kylli shaphang kita ki daw hynrei haduh ba pynmih ia ka jingpynbna ha ka 7 tarik K’lyngkot 2025, nga la shu iohi lyngba ki lad pathai khubor ba ka (VPP) la ai ticket noh sha uwei bad khlem pyntip eiei ia nga la ka long da ka phone ne ka jingthoh”.
 na Nongstoin Constituency, ula pynpaw ia ka jingsah ha ka um dum halor ka rai ba syndet syndet jong ka VPP ban knieh noh ia ka ticket tang da ki taiew hadien bala dep pynbna paidbah ia ka kyrteng jong u.){kind=link}