Elekshon MDC | Pynkhreh ka EKH ban wanrah ia ka elekshon kaba iaid beit ha ki 15 Constituency

Naduh 27 tarik K’lyngkot yn treikam ka Model Code of Conduct

Shillong, K’lyngkot 24 : Ki Bor District ka East Khasi Hills, kila pynbit pynbiang nadong hadong ha ka jingpynkhreh ban wanrah ia ka elekshon kaba iaid beit iaid ryntih, ba khuid bad ba suk ba sain ha ki 15 tylli ki Constituency jong ka Khasi Hills Autonomous District Council (KHADC), kiba hap hapoh u pud u sam jong ka District.

Haba kren sha ki lad pathai khubor ha ka sngi Thohdieng, ka Deputy Commissioner Kong RM Kurbah kala pyntip ba ka jingpyniaid ia kane ka elekshon kan long napoh ka Inter-State Bus Terminus (ISBT) ha Mawlai ha ka jaka jong ka Jawaharlal Nehru Stadium ha Polo.

“Na ki 15 tylli ki Constituency ka KHADC, ka jingthep kyrteng jong ki kyrtong na ki 10 constituency kan long ha ISBT, Mawiong, 3 tylli-ka Nongspung, Sohiong bad Sohryngkham-kan long ha DC Office, Shillong bad artylli-ka Pynursla bad Langkyrdem-ha Ophis u SDO Civil Pynursla” kala pyntip.

“Ka jingniew ia ki vote jong kine ki 15 tylli ki constituency ruh kan long ha ISBT baroh” kala bynrap.

Ka DC kala pynpaw ba ka jingsdang plie biang jong ki skul, ka jingsdang jong ki Board Exam bad ka jingdheng kali, ki dei ki daw ba la rai ban pynkynriah ia ka jaka pyniaid ia ka elekshon sha ISBT, Mawiong.

Kala pyntip ruh ba ka sngi ban buh ia ki jingkam bad jingpyrshah ia ka jingpynrung kyrteng ha ka electoral roll kala kut ha ka 22 tarik Kyllalyngkot bad ia ka electoral roll ba khatduh yn sa pynmih ha ka 27 tarik Kyllalyngkot bad yn sa aiti ruh sha baroh ki seng sain pyrthei. La pyntip ba ka Ophis kala dep ruh ban ai jinghikai haduh arsien ia ki RO, ARO bad ki Seng Sain Pyrthei ruh kumjuh.

Nalor kane, ka DC kala ong ba ka jinglong jingman ka suk ka sain ha ka District ka long kaba jai jai bha lait noh tang ha kawei ka jaka. Kat kum ka jingong jong ka, ka shnong Mawkynrew ka dang don hapdeng ka korphiw namar ka jingkulmar ba mih dang shen halor ka jingshna ia ka Iingskul.

“Ka dang don hapoh ka korphiw. Kawei ka jaka ka dei ka skul Ramakrishna bad ia kane yn sa pynbeit noh shen” kala kular.

Haba pynbna ba ka Model Code of Conduct (MCC) kan sa treikam noh naduh ka 27 tarik Kyllalyngkot, ka kong Kurbah kala ong “Ngi la pynmih ia ki jingpynjari ban pynthikna ba am dei ban don ka jingpynkhein ia ka MCC. Kano kano ka jing pynkhein ia ka MCC yn sa bishar da ka DC bad ki RO”.

Kala pyntip ba u pud bala buh ia ki kyrtong ban pynlut ha kane ka elekshon ka long T.5 lak bad ka security deposit ka long T.3000.

“Baroh ki kyrtong kin hap pan jingbit na ka Ophis ka DC, SDO ban pynlong ia kano kano ka jingialang paidbah, jingiaid paidbah bad ki rally. Ka kynthup ruh ia ka jingpyndonkam ia ki tynghung” kala ong haba bynrap “La khang ia ka jingrah pisa ba palat ia ka T.50,000, hynrei ki nongtreikam lajong kiba rah pisa palat ia ka T.50,000 ki lah dep ban pan jingbit bad air uh ia ki kot ki sla ba donkam. Ngi la pynmih ruh ia ka hukum ba ki briew kin wan aiti ia ki tiar siat”.