Shillong, K’lyngkot 20 : U President ka United Democratic Party (UDP) Bah Metbah Lyngdoh ha ka sngi Nyngkong, ula kam ba ka party kan sa pynkyndit ia baroh ha ka elekshon ban wan sha ki artylli ki Autonomous District Council (ADC) ka Ri-lum Khasi bad Jaintia, ka ban long la 21 tarik Rymphang.
Haba kren sha ki lad pathai khubor hadien ka jingpynbna ia ka thup kyrteng ba lai jong ki kyrtong, u Bah Metbah ula ong “Ai ba ngan kular ha phi ba ha kane ka kynti ka long kaba phylla ba ngi la ioh ia ki kyrtong kiba biang bha bad ngin sa ioh ia ka jingiakhun kaba itynnad bad kan sa pynkyndit ruh ia baroh”.
U pyntip ba ka party kala trei shitom ban pynthikna ba kan ioh thaw ia ki Executive Committee ba thymmai ha KHADC bad JHADC.
“Ta ka daw ngi la bishar bha ia ki kyrtong. Kala shimpor khyndiat hynrei ngi la kren shai bha ba ki kyrtong ha kane ka kynti kim dei tang kiba shu pyndap ia ki seat ban iakhun ia ka elekshon hynrei ki dei ki kyrtong kiba biang suba na baroh ki constituency ba ngi pynieng”.
Nalor kane, u Bah Metbah ula ong ba ka rai jong ka party bad ka paralok ha ka Regional Democratic Alliance(RDA)-ka HSPDP ban nym iatreilang ha ka elekshon,kan nym don jingktah satia ia ka jingleh bha jong ka party ha ka elekshon ban wan.
U MLA ka Sohra Bah Synshar Kupar Roy Lyngdoh u dei uwei na ki lain gut ki kyrtong bala pynbna da ka party hynne ka sngi ban iakhun ia ka elekshon KHADC. Ki arngut kiwei pat ki kynthup ia u Bah Anthony Khongwang na Nongskhen bad u Bah Lee Trevor B Bareh na Jirang.
Ha JHADC, ka party ala rai ban pynieng ia u Bah Meiowan Pasi na Nongbah-Mihmyntdu.
Haduh mynta, ka UDP kala pynbna ia 22 ngut ki kyrtong sha ka elekshon ha KHADC bad 17 ngut jong ka JHADC.
Kat kum ka jingong u Bah Metbah, ka thup kyrteng ba khatduh jong ki kyrtong yn sa pyllait ha kine ki shisngi arsngi ban wan.
U pyntip ba ka party kala dep ban pynkhreh ia ka manifesto na ka bynta ka elekshon MDC bad ia kane ka manifesto yn sa pyllait noh shen.
 Bah Metbah Lyngdoh ha ka sngi Nyngkong, ula kam ba ka party kan sa pynkyndit ia baroh ha ka elekshon ban wan sha ki artylli ki Autonomous District Council (ADC) ka Ri-lum Khasi bad Jaintia, ka ban long la 21 tarik Rymphang.){kind=link}