Shillong, K’Lyngkot 31: U president ka Meghalaya Pradesh Congress Committee (MPCC) u bah Vincent Pala hynne ka sngi ula ong ba ki don artylli ki konstitwensi hapoh rilum Garo kiba iaknieh Ticket ha kane ka ilekshon ban wan.
U bah Pala ula iathuh ba ka jingiaknieh Ticket ha Party Congress kadei ha Salmanpara bad ha Gambegre konstitwensi hadien ka jingwan iasoh noh u MLA ka National Congress Party (NCP) u Saleng A Sangma shaka Congress.
“U Saleng hashuwa ban wan pyniasoh shaka Congress ula leit hi sha nongbah Delhi ban iakren bad ki nongialam ka All India Congress Committee (AICC) ba lada un iasoh shaka Congress udei ban ioh ban iakhun hi na Gambegre bad udei ruh ban pynieng kyrtong mon lade na Salmanpara konstitwensi” la ong u bah Pala.
U bah Pala ula ong ba haka jingshisha ka MPPC kala pynkhreh ban pynieng da u samla ka Congress na Salmanpara konstitwensi ban iakhun ha kane ka ilekshon ban wan hynrei naka liang ka AICC hadien ka jingiasngewthuh jingmut bad u Saleng, kala phah kyrwoh biang shaka MPCC ba iaka Ticket naka bynta ka Salmanpara konstitwensi dei ban ai hi sha u kyrtong ba jied hi da u Saleng.
Ula ong ba kum u president ka MPCC u sngewthuh iaka jingmih noh ki katto katne ki samla na Salmanpara bad na Gambegre konstitwensi hynrei kum ki nongtrei bad nongkyrshan ka Congress, kidei ban sngewthuh ba kidei ban buh iaka jingmyntoi ka Party ha khmat ym iaka jingmyntoi ialade shimet.
Shuh shuh u bah Pala ula iathuh ba ka jingshah kyntait u nongialam barim bad kyrtong ka Congress na Kharkhutta konstitwensi u Omillo K Sangma kadei hadien ba ka Congress kala dep ban bishar ba une u kyrtong um lah ban poi shaka jingjop bad dei namar kane ka Congress ka hap ban pynieng noh da uwei u kyrtong.
Ula bynrap ba naka liang ki nongialam ba rangbah ka Congress na rilum Garo ba kynthup ka Deborah, Billykid bad u Saleng kila ai jingmut ba dei ban pynieng kyrtong ha Kharkhutta konstitwensi da u trai shnong ym da u Omillo K Sangma u bym dei trai shnong.
“Kum u nongialam ka MPCC ngam lah ban lait lan iaka jingai jingmut ki nongialam ba rangbah ka MPCC na Garo Hills bad dei namar kane la pynduh ticket noh ia u samla na Salmanpara bad ia u Omillo K Sangma na Kharkhutta konstitwensi namar ka Party ka la shim iaka rai ban pynieng da ki kyrtong kiba don jingkyrmen ban jop” la bynrap u bah Pala.
Nalor kane u bah Pala ula ong ba watla ka don ka jingiaknieh Ticket ha Garo Hills hynrei ka Party ka thikna ba kane kam ktah satia iaka jingpynkhreh iaka ilekshon ban kan ioh ruh ka jingjop ha kane ka ilekshon ban wan.
